Mundua -
Ekialde Hurbila
Israelgo Parlamentuak Gobernu berria babestu eta Netanyahuren aroari amaiera eman dio
"Aldaketaren Gobernu" berria "boteretik kentzeko" moduak bilatuko dituela ziurtatu du Benjamin Netanyahuk.
EiTB Media | Agentziak
Israelgo Parlamentuak (Knesset) Neftali Bennett Jamina mugimendu abertzaleko buruzagiaren inbestidura onartu du igande honetan. Honenbestez, lehen ministro berria da. Bozketak Benjamin Netanyahuren agintaldiari amaiera eman dio.
Aldeko 60 boto, aurkako 59 eta abstentzio batekin batasun nazionaleko Exekutibo berriak oniritzia jaso du; emaitza oso estua izan da, beraz. Aurreneko bi urteetan Neftali Bennett ultrazionalistak zuzenduko du Gobernua, eta Jair Lapid zentristak hurrengo bietan. Bi urteko blokeo politikoarekin amaitu du gaurko osoko bilkurak.
Neftali Bennett ultranazionalista erlijiosoak adiskidetze nazionala aldarrikatu du Israelgo Parlamentuan, Gobernu berria berresteko saioan. Tentsio handiko osoko bilkura izan da.
"Nazioaren eta Estatuaren lidergoa hurrengo belaunaldiari pasatzeko unea da", esan du Bennettek. Era berean, Benjamin Netanyahuri eskerrak eman dizkio, Israelen zerbitzura eman dituen 12 urteengatik, nahiz eta desadostasunak izan.
Parlamentuko saioari hasiera eman dio Bennettek, Netanyahuren Likudeko, alderdi ultraortodoxoetako eta Alderdi Sionista Erlijiosoko parlamentariek iraintzen eta errieta egiten zioten bitartean. Horrela, hitzaldia behin baino gehiagotan eten diote. Are gehiago, Itamar Ben Gvir eta Bezalel Smotrich Alderdi Sionista Erlijiosoko kideak saiotik kaleratu behar izan dituzte.
Bestalde, Israelen "existentzia eta segurtasuna bermatzeko misioarekin aurrera" jarraituko duela esan du Benjamin Netanyahuk. "Aldaketaren Gobernu" berria "boteretik kentzeko" moduak bilatuko dituela ziurtatu du.
"Oposizioan egongo bagara, burua gora dugula egongo gara, Gobernu arriskutsu hau boteretik kendu arte", adierazi du Netanyahuk saioan. 12 urte jarraian boterean eman ditu.
Neftali Bennett lehen ministro berriak zilegitasunik ez duela esan du Netanyahuk Ganberan, Iran bezalako etsaien aurrean koalizio "ahula" osatzen dutelako.
"Israelgo historian iruzurrik handiena" egin izana eta eskuineko boto-emaileei agindutakoa ez betetzea leporatu dio Netanyahuk Bennetti. "Biztanleriak ez du ahaztuko", ohartarazi dio.
