Mundua -
Euroaren inguruko galdeketa
Alemaniak ezeztatu egin du Greziako erreferenduma proposatu izana
Ekainaren 17ko hauteskundeekin batera, Angela Merkelek Grezian euroaren inguruko galdeketa egitea proposatu duela esan du Atenaseko gobernuko bozeramaileak.
Erredakzioa
Alemaniako gobernuak ezeztatu egin du Angelak Merkelek Grezian euroaren inguruko erreferenduma egitea proposatu izana. ''Informazio horiek ez dira zuzenak'', esan du Alemaniako gobernuko bozeramaile batek.
Horrela, gezurtatu egin dute aurretik Dimitris Tsiodrasel Greziako gobernuko ordezkariak esandakoa. Tsiodraselen arabera, ekainaren 17an, hauteskundeen errepikapenarekin batera, Grezian euroaren inguruko erreferenduma egitea proposatu dio Merkelek Karolos Papulias Greziako presidenteari, bertako herritarrek euroan jarraitu nahi duten ala ez adierazi dezaten.
Ez da izan eguneko ezeztapen bakarra
EBk gezurtatu egin du Grezia eurogunetik ateratzea prestatzen egotea. Europako Batzordearen eta Olli Rehn Ekonomia Gaietarako komisarioaren arabera, EB ez da egoera prestatzen ari Grezia eurogunetik ateratzeko balizko aukeraren aurrean. Beraz, Karel De Gucht Merkataritza komisarioaren hitzak ezeztatu dituzte.
