Ekuadorko presidentea kargutik kentzeko eskatu du emakume indigenak buru zituen martxa batek

Ekuadorko Asanblada Nazionalak Guillermo Lasso presidentearen kargugabetzeari buruzko eztabaida luzeari ekingo dio 16:00etan (Euskal Herrian 23:00ak direnean). Virgilio Saquicela Parlamentuko presidenteak baieztatu duenez, oraindik 40 bat diputatu daude agintariaren kargugabetzeari buruz hitz egiteko euren txandaren zain.

Ebazpenak batzarkideen bi herenen aldeko botoa beharko du, 92 boto, hain zuzen ere.

Ekuadorko Nazionalitate Indigenen Konfederazioak (CONAIE) eta beste gizarte-erakunde batzuek deituta, lanuzte nazionala egiten ari dira oinarrizko elementuen kostuen igoeragatik protesta egiteko. Azken protesta jendetsua emakume indigenek ireki dute.

14. eguna dute protestan, eta, gutxienez, lau pertsona hil dira denbora horretan. Azken orduotan elkarrizketak hasiko zituztela zabaldu bada ere, Leonidas Iza CONAIEko presidenteak ohartarazi du mobilizazioari eutsiko diotela, Virgilio Saquicela Asanbladako presidentearekin eta Gobernuko ministroekin akordiorik lortu ez dutelako. Izan ere, atzo egindako bileran ez zela euren eskaerarik aztertu ere egin salatu du.

Beste aldean, Quitoko auzo aberatsenetako bateko biztanleek ere manifestazioa egin zuten atzo Gobernuaren aurkako protesten kontra eta Leonidas Iza buruzagiaren kontra.