Itxi

Mundua

MidCat proiektua

Scholzek berreskuratu egin du gasa Espainiatik eta Portugaletik Alemaniara garraiatzeko proiektua

Agentziak | EITB Media

MidCat izeneko proiektua duela zenbait urte utzi zuten bertan behera, Alemaniarentzat merkeagoa zelako gasa Errusiatik inportatzea.

1:19
Gas-hornidura

Gasa Portugaletik eta Espainiatik, Frantzian zehar, Europara garraiatzeko proiektua berreskuratzea planteatu du Alemaniak, urteetan zehar Errusiako energia merkearen aldeko apustua egin ondoren. Orain, ordea, eskarmentua hartu du, Moskuko energiaren menpeko bihurtu baita.

Iberiar penintsulatik datorren gas-hodiak "egungo egoera arintzen nabarmen lagunduko luke", onartu du Olaf Scholz Alemaniako kantzilerrak prentsaurrekoan, udako oporraldiaren ondotik.

Gas-hodia "eraikitzea posible zen" eta, "orain, haren falta sumatzen dugu", onartu du Scholzek. Egitasmoa berreskuratzeko aukera Portugal, Espainia, Frantzia eta Europako Batzordeko agintariekin aztertu dutela esan du Alemaniako buruzagiak.

220 kilometro eraikitzea falta

Horrela, MidCat proiektuari buruz mintzatu da, nahiz eta espresuki ez aipatu. Duela urte batzuk egitasmoa baztertu zuten, Errusiako gas naturala inportatzea onuragarriagoa zela iritzita. Hostalric (Katalunia) eta Frantziako hegoaldearen artean 220 kilometro inguru eraiki barik geratu ziren.

Afrikako iparraldearekin loturak izateak "hornidura dibertsifikatzen" lagunduko luke, argudiatu du Scholzek. Horrela, Alemaniak Baltikotik Nord-Stream gasbidearen bitartez jasotzen duen Errusiako gasaren menpeko bihurtzea "hanka-sartze" bat izan dela onartu du kantzilerrak.

El canciller alemán, Olaf Scholz, durante la conferencia. Foto: EFE

Olaf Scholz Alemaniako kantzilerra, prentsaurrekoan. Argazkia: EFE

Scholzen hiruko Gobernua (sozialdemokratak, berdeak eta liberalak), iazko abendutik boterean dagoena, mendekotasun energetikoa murriztera beharturik dago. Gerhard Schroder sozialdemokratak zein Angela Merkel kontserbadoreak utzitako ondarea izan da.

"Gobernu guztiek, enpresa orok, egoerak aldatu daitezkeela kontuan izan behar dute, eta horretarako prestatu", adierazi du. Errusiako gas hornidura murrizketa baten aurrean, alternatibarik ez zegoela nabarmendu du, eta koalizio Gobernua "ezustean" harrapatu zuela. Scholz Ekonomia ministro izan zen Merkelen azken Gobernuan; beraz, nolabait, bere erantzukizuna onartu du.

Gas deposituak % 75era, eta zentral nuklearren itxiera atzeratzeko aukera

Nahiz eta Nord Streamen hornidurak behera egin, Alemaniako gas deposituek % 75eko gaitasuna lortu dute, Bundesnetzagentur agentziaren arabera.

Scholzen Gobernuak irailaren 1ean deposituak % 75era izatea jarri zuen helburu, urriaren 1ean % 85era jartzeko eta azaroaren 1ean, % 95era.

Bitartean, hiruko Exekutiboan, ez dago martxan diren hiru zentral nuklearren itxiera atzeratzeko aukeraren inguruko akordiorik. Teorian, urte bukaeran zerbitzutik kanpo geratu behar dira. Hiru zentral nuklearrek Alemaniako argindarraren % 6 ekoizten dute.

  • Bisitatuena

      Kargatzen ikusiena
      Kargatzen ikusiena