Mundua -
gaixotasunak
16 adingabe hil dira Erresuma Batuan A estreptokokoaren ondorioz
Osasun agintariek gizarte interakzioen gorakadari egotzi diote kasuen hazkundea, isolamendu denboraldi luzeen ondoren. Bestalde, Farmazien Elkarte Nazionalak penizilinaren hornikuntza katean "etenaldiak" gertatzen ari direla ohartarazi du.
agentziak | eitb media
Sussex konderriko (Ingalaterrako hegoaldea) bigarren hezkuntzako ikastetxe bateko ikasle bat hil da A estreptokokoak eragindako infekzio baten ondorioz. Erresuma Batuan 16 adingabe hil dira, osasun agintari britainiarrek lrunbat honetan jakitera eman dutenez.
UKHSA South East erakundeko Rachael Hornigold doktoreak adierazi duenez, A estreptokokoak eragindako infekzioek "normalean eztarriko mina, sukar eskarlata eta azaleko legena eragiten dituzte, eta kontaktu fisikoaren bidez edo doministiku zein eztul tanten bidez kutsatzen dira".
"Oso kasu arraroetan, infekzioa inbaditzaile bihurtzen da eta normalean bakteriorik ez dagoen gorputzeko ataletan sartzen da, eta hori larria izan daiteke", ohartarazi du adituak.
Osasun agintariek azpimarratu dutenez, ez da bakterio horien aldaera berririk atzeman, eta aurreko urteekin alderatuta, kasuen hazkundea interakzio sozialen gorakadari egotzi diote, koronabirusaren pandemian isolamendu denbora luzez egon ostean.
Erresuma Batuko Farmazien Elkarte Nazionalak aste honetan ohartarazi duenez, penizilinaren hornikuntza katean "etenak" gertatzen ari dira, eta Farmazia Independente Anitzen Elkarteak ziurtatu du herrialde osoko establezimenduak arazoak izaten ari direla hainbat antibiotikoz hornitzeko.
Steve Barclay Osasun ministroak ukatu egin du aste honetan eskasia dagoela, eta ziurtatu du antibiotikoak hornitzea ez dela "kezka bat une honetan".
Antzeko kasuak
2016an, lau urteko haur bat hil zen Gurutzetako Ospitalean, shock septiko baten ondorioz, barizela bat izan ondoren.
Egindako analisi mikrobiologikoen emaitzek orduan adierazi zutenez, ernamuina A estreptokoko bat zen eta, beraz, heriotzaren arrazoia sepsis estreptokoziko bat izan zen.
Javier Benitok, Gurutzetako Ospitaleko Pediatriako Larrialdietako buruak, une hartan azaldu zuen "ezohiko" kasua zela, infekzioa "normalean garrantzitsuak ez diren infekzioak eragiten dituelako".
Antibiotiko bidezko tratamenduak, oro har, bakterioa hedatzeko gaitasuna ezabatzen du infekzio kasuetan.