Gazan "su etenari bide emango dion etenaldi humanitario bat" eskatu du EBk lehenbizikoz

Europar Batasuneko buruzagiek "berehalako etenaldi humanitarioa" galdegin dute Gazaren aurkako erasoaldian, "su eten jasangarri bat, bahituak baldintzarik gabe askatzea eta giza laguntza sartzea" bermatze aldera.

Gerra hasi zenetik, lehen aldiz eskatu du EBk, bere osotasunean, Gazarentzat su etena, azkenengoz gai horretaz aritu zirenean, urrian, "etenaldi humanitarioak" soilik adostu baitzituzten. 

"Batera gaudenean eragin handiagoa dugu (...), eragile sinesgarria garela erakusten dugu eta paper garrantzitsua bete dezakegu Israelgo Gobernua konbentzitzeko bidean", esan du bart Europako Batzordeko presidente Charles Michelek, Bruselan prentsaurrekoan. Goi bilera gaur amaituko da.

Michelek azpimarratu du testua onartzeko orduan EBk aintzat hartu duela AEBk "berehalako su etena" eskatuz Segurtasun Kontseiluan aurkeztutako ebazpena.

Bestalde, "bake jasangarri eta iraunkor baterako konpromisoa" erakutsi duten buruzagiek Israeli exijitu diote "Rafahn erasoaldia" ez burutzeko.