Albiste izango dira: Nazioarteko Justizia Auzitegiaren erabakia, Parke naturalen eguna eta Palmako ezbeharra

Honako gai hauek hartuko dituzte gaur, 2024ko maiatzaren 24an, hedabideetako lerroburu nagusiak:

- Nazioarteko Justizia Auzitegiaren erabakia: Hegoafrikak Israelen kontra eskatutako kautelazko neurri gehigarrien gaineko erabakia gaur emango du ezagutzera Hagan egoitza (Herbehereak) duen Nazioarteko Justizia Auzitegiak. Israelgo Gobernua Rafahn egiten ari den "operazio militarra berehala bertan behera" uztea eskatu zuen Hegoafrikak, palestinarren kontrako "genozidioa ekiditeko". 13:00etarako deitu dute gaurko saioa.

- Parke naturalen Europako eguna: 1909ko maiatzaren 24an izendatu ziren Europako lehen natur parkeak, Suedian. Hori dela eta, Europarc federazioaren bultzadarekin, natur parkeen Europako Eguna ospatzen da urtero egun honetan. Euskal Herrian 12 parke natural daude: Aiako Harria, Aizkorri-Aratz, Aralar, Armañon, Bardeak, Bertiz, Gorbeia, Izki, Pagoeta, Urbasa-Andia, Urkiola eta Valderejo.

- Palmako ezbeharra: Lau pertsona hil dira eta gutxienez 16 zauritu dira Palmako hondartzan (Balear Uharteak), jatetxe bat behera etorri ondoren. Larrialdietako zerbitzuak hondakinen azpian harrapatuta egon daitezkeen biktima gehiagoren bila ari dira. Lehen hipotesien arabera, lehen solairuaren gehiegizko pisuak eragin du istripua.