Politika -
Elkarrizketa Radio Euskadin
Herriei ezin zaiela elkarbizitza inposatu ohartarazi du Egibarrek
Igande honetako ospakizunaren harira jeltzaleak esan duenez, "egun ez dira ematen beharrezkoak diren baldintzak indar abertzaleen arteko Aberri Egun bateratua egiteko".
Erredakzioa
Joseba Egibar EAJko buruzagiak "erabakitzeko eskubidea" defendatu du, "izate bereko eskubidea delako", eta herriei ezin zaiela elkarbizitza inposatu ohartarazi du. Halaber, Erresuma Batuko eta Eskoziako adibidea ekarri du gogora. "Hemen ez da gauza bera gertatzen, hemen debekuekin konpontzen da dena", deitoratu du.
Radio Euskadiri eskainitako adierazpenetan jeltzaleak esan duenez, "egun ez dira ematen beharrezkoak diren baldintzak indar abertzaleen arteko Aberri Egun bateratua egiteko".
"Komuneko estrategia bat gutxienez eman behar da, zure aurka egiten dutenean oso zaila da eztabaida garatzea", adierazi du Egibarrek, "urte askoz ezker abertzaleak garatutako estrategian protagonista handia ETA izan da, eta orain, eredu berri batera goaz. Garapen horren zain egongo gara".
Egibarrek azaldu duenez, EAJrentzat Aberri Eguna "herri eta nazio alorreko jaia da, eta euskal nazioa garen heinean, hainbat erronka ditugu aurre egiteko", besteak beste, bakea eta elkarbizitza sendotzea, krisitik irtetea eta "nazio aitorpena lortzea, gure etorkizunaren jabe izateko".
