Politika -
Maiatzaren 18an
Kristau elkarteek 'M18Plazara' ekimenari atxikimendua eman diote
Maiatzaren 18an presoen eskubideen alde Euskal Herriko plazak betetzeko Herrirak antolatutako ekimena da.
Erredakzioa
Hainbat kristau elkartek, Euskal Herriko Apaizen Koordinakundea, Herria 2000 Eliza eta Talde Kristauak, besteak beste, Herrirak antolaturiko "M18Plazara" ekimenari atxikimendua azaldu diote Donostian.
Mobilizazio honek Baionan azaroaren 10ean eta Bilbon urtarrilaren 12an egindako manifestazio jendetsuei jarraipena eman nahi die, eta horretarako, larunbaterako Euskal Herriko 200 plazatan mobilizazioak deitu dituzte presoen eskubideen alde eta espetxe politika aldatzea aldarrikatzeko.
Artzai Onaren Plazan bildu dira, Donostian "presoak askatzeko bidali naute" lelopean.
Mila Elvira bozeramaileak "Estrasburgoren erabakia" betetzeko eskatu du; izan ere, "Ines del Rio berehala aske uztea ebatzi zuen Parot doktrinak giza eskubideak urratzen dituela iritzita", adierazi du.
"Epaia onartu beharrean, espainiar estatuak baliogabetu egin du eta giza eskubideen urraketen estrategiari eutsi dio", gaineratu du.
Ildo horretan, Parot doktrina ezarri zaien 73 presok, "zigor guztia bete duten arren", atxilotuta jarraitzen dutela ekarri du gogora, eta "Europari, era bateratuan, giza eskubideen, bakearen eta irtenbidearen aldarrikapena iritsarazi behar zaio", horren iritzian.
