Politika -
Auzitegi Nazionala
Puellesen ustezko hiltzaileen kontrako epaiketa hasiko da gaur
Fiskaltzak 45 urteko kartzela-zigorra eskatzen du ETAren 'Otazua' taldeko hiru ustezko kideentzat, hilketa terrorista eta txikizioa egite leporatuta.
Erredakzioa
Auzitegi Nazionaleko Zigor Aretoa Eduardo Puelles Espainiako Poliziako inspektorearen hiru ustezko hiltzaileak epaitzen hasiko da gaur. Iñigo Zapirain, Beatriz Etxebarria eta Daniel Pastor dira epaituko dituzten ETAren 'Otazua' taldeko ustezko kideak, eta 2009ko ekainean Arrigorriagan poliziaburua hiltzea leporatzen diete.
Ana Noe Auzitegi Nazionaleko fiskalak 45 urteko kartzela-zigorra eskatzen du hiruen kontra, Estatuko Segurtasun Indarretako kide baten kontrako hilketa terrorista eta txikizio terrorista egitea leporatuta.
Era berean, Ministerio Publikoaren ordezkariak zigorra bete ostean 10 urtez Bilbon bizitzeko debekua ezarri nahi die Zapiraini, Etxebarriari eta Pastorri.
Inputatuen ardura zibilari dagokionez, Fiskaltzak 200.000 euroko kalte-ordaina eskatzen die Francisca Hernandez y Sotela alargunarentzat, eta 150.000 eurokoa, seme-alaba bakoitzarentzat.
Ministerio Publikoaren idatzian agertzen denez, Informazio Brigadako inspektorea autoan jarritako bonba-lapa batek hil zuen, Arrigorriagan. Fiskaltzaren arabera, 2009ko ekainaren 18tik 19rako goizaldean, ETAko kideak Puellesen ibilgailura joan ziren eta lehergailua jarri zuten autoaren azpian.
Lehergailua 2 kilo kloratitaz eta 200 gramo pentritaz osatuta omen zegoen, eta Zapiraini leporatzen diote horren fabrikazioa. Lehergailua autoaren azpian kokatzeko, Pastorren laguntza izan omen zuen, eta Etxebarriak zaintza lanak egin zituela uste dute.
