Auzitegi Nazionalak ETAko beste hamabi presoren kasuak aztertuko ditu

Auzitegi Nazionalak ETAko hamabi preso kartzelatik aterako dituen erabakiko du, ostiral honetan, Estrasburgoko Giza Eskubideen Auzitegiak 'Parot doktrina'ren aurkako epaia eman ostean. Gainera, GRAPOko bi kide ere kartzelatik aterako dituzten aztertuko duela adierazi du.

Zehazki, ondorengo presoen kasuak aztertuko ditu Auzitegi Nazionalak azaroaren 15ean: Antxon Lopez Ruiz "Kubati", Inmaculada Noble, Francisco Javier Lujanbio Galdeano, Jesus Diaz de Heredia Ruiz de Arbulo, Pedro Juan Odriozola Agirre, Juan Mari Gabirondo Agote, Pedro Mari Rezabal Zurutuza, Miguel Turrientes Ramirez, Jose Felix Zabarte Jainaga, Maritxu Uzkudun Etxenagusia, Gonzalo Rodriguez Cordero eta Antonio Alza Hernandez.

Aske utziko dituzten ETAko hamabi preso horien artean (gehiago ere izan litezke) Inmaculada Noble dago. Ines del Riorekin batera Madril taldeko kidea izandakoa, 1986an Ricardo Saenz de Ynestrillas komandatea hiltzeagatik kondenatu zuten, baina Dominikar Errepublikako Plazan hamabi guardia zibil hiltzeagatik absolbitu zuten.

"Kubati", berriz, Maria Dolores Gonzalez "Yoyes" ETAko kide ohia hiltzeagatik da ezaguna, baina 1.210 urteko zigorra ezarri zioten, 13 hilketa eta heriotza eragin zuten 8 atentatu egiteagatik.

GRAPOko kideen artean, Laureano Ortega (1988an Claudio San Martin enpresaria hiltzeagatik kondenatu zuten) eta Olga Oliveira daude.

Fiskaltzak presoak askatzea babestu du

Auzitegi Nazionaleko Fiskaltzak begi onez hartuko luke ETAko 12 preso eta GRAPOko beste bi aske uztea, Estrasburgoko Auzitegiak 'Parot doktrina' baliogabetu eta atzo Auzitegi Gorenak hartu zuen erabakia hartu ostean.

Jesus Alonso Auzitegi Nazionaleko fiskalburuordeak idatzi batean azaldu duenez, "atzo Auzitegi Gorenak adostutakoa adostu ondoren, horren arabera jokatu behar da".