Politika -
ETA-ren desarmea
Oihartzuna nazioartean
Frantzian, Le Monde-k editoriala eskaini dio eta Erresuma Batuko BBCn oihartzuna izan du egiaztatzaileek Auzitegi Nazionalean egindako deklarazioa, eta Bill Clintonek zorte ona opa dio bake prozesuari
Erredakzioa
Azken egunotan Euskal Herriko bake prozesuaren inguruan gertaturikoaren oihartzunak mugak gainditu ditu. Zehazki esateko, ETAk armak erabili ezinik uzteko prozesua hasi duela jakinarazi zuen ostiralean Egiaztatzaileen Nazioarteko Batzordeak, eta gaur Auzitegi Nazionalean lekuko gisa deklaratu behar izan dute. Horrek guztiak zeresan handia eman du nazioartean.
Erresuma Batuan, BBC kate publikoak arreta gehiago eskaini dio nazioarteko egiaztatzaileek gaur Auzitegi Nazionalean egin duten deklarazioari, ostiraleko iragarpenari baino. BBCk bideo bat argitaratu zuen esklusiban nazioarteko katean, baina Erresuma Batuan ez zuten erakutsi.
Frantzian, Le Mondek editoriala eskaini dio Euskal Herriari eta Parisen eta Madrilen inmobilismoa salatu du. Euskal Herrian bizi den garaia, pasatzen utzi behar ez den unetzat jo du. Bestalde, nazioarteko egiaztatzaileen lana goraipatu du, eta Rajoyk horiek ez onartzea tamalgarritzat jo du. Halaber, Espainiako eta Frantziako Gobernuei jarrera aldatzeko eskatu die, eta zehazki Espainiari presoen sakabanaketa politikoa amaitzeko.
Bestalde, Bill Clinton AEBetako presidente ohiak zorterik onena opatu dio Euskal Herriko bake prozesuari, twitter bidez.
