Sarkozy inputatu egin dute ustelkeriagatik eta eragimen-trafikoagatik

Nicolas Sarkozy Frantziako presidente ohia inputatu egin dute ustelkeriagatik, eragimen-trafikoagatik eta sekretu profesionalaren urraketa ezkutatzeagatik.

Sarkozyk atxilotuta deklaratu du 15 orduz Poliziaren aurrean, gero beste hiru epaileen aurrean, eta ondoren iritsi da Fiskaltzaren erabakia.

Frantziako zigor kodearen arabera, eragimen-trafikoagatik 10 urte arteko kartzela-zigorra eta 150.000 euroko isuna jar diezaiokete. Era berean, eskubide zibil batzuk ken diezazkiokete.

Thierry Herzog Sarkozyren abokatua eta Gilbert Azibert epailea ere inputatu dituzte.

Hirurek deklaratu dute atxilotuta Polizia Judizialaren aurrean, abokatu bat edukitzeko eskubidearekin, baina Sarkozyk horri uko egin dio, bere abokatua atxilotuta dagoelako eta lanbidez abokatua delako.

Susmoa dute Auzitegi Nagusiko hiru magistratuk 2007ko hauteskunde-kanpainako ustezko legez kanpoko finantziazioaren inguruan irekitako ikerketari buruzko informazioa ematen ziotela.

Teoria horren arabera, Sarkozyren abokatuak Monakoko administrazioan postu bat lortzen lagunduko ziola hitzeman zion Azibert epaileari informazioaren truke.

Entzuketen auziaren baitan kokatzen da ikerketa. Berez, beste ikerketa batetik abiatzen da prozedura judiziala, Muamar Gadafi buruzagi libiarrak diru beltzarekin Sarkozyren hauteskunde-kanpainari legez kanpoko laguntza eman ote zion ikertzen duenetik, hain zuzen ere.

Sarkozy zazpi auzitan ikertzen ari dira, eta Bettencourt auzian behin-behinean inputatu zuten. Kasu horretan L’Oreal enpresaren jabeak hauteskunde-kanpaina legez kanpoko finantzatzen lagundu zuen ikertzen ari dira.