Politika -
Elkarrizketa Euskadi Irratian
PSErekin 'koalizio gobernua' osatu nahi duela adierazi du Urtaranek
EH Bildu, PSE, Sumando eta Irabazi alderdietan akordioak lortzeko "jarrera positiboa" sumatu duela esan du Gasteizko alkateak, baina ez, ordea, PPn.
eitb.eus
Gorka Urtaran Gasteizko alkatea PSE-EErekin "koalizio gobernua" osatzearen alde agertu da, eta alderdi sozialistarekin harremanak "oso onak" direla aitortu du.
"Gasteizko Udal taldearen [PSErena] esku egongo balitz, seguru sartuko zela Gobernuan", gaineratu du, Euskadi Irratian egindako elkarrizketan.
Nolanahi ere, beste alderdiekin ere "akordioak" lortu nahi dituela adierazi du.
Horren ildotik, EH Bildu, PSE, Sumando eta Irabazi alderdietan "jarrera positiboa" sumatu duela esan du, baina ez, ordea, PPn. "Eurek jakingo duten", deitoratu du.
"Akordioak lortu daitezke alderdi askorekin, eta PP ez da beharrezkoa gehiengoa izateko”, ohartarazi du.
Urtaranen esanetan, "badakit nola iritsi garen [agintera] eta esku zabal izan behar dugula eta akordioak behar ditudala". Horregatik, "akordioaren alkate" izan nahi duela aldarrikatu du.
Bestalde, Gasteizko alkateak deia egin du Andre Maria Zuriaren jaietan "gozatzeko", baina hori "errespetuz" egitea eskatu du.