Asironek dio omenaldietara joango dela, senideak aurka ez badaude

Joseba Asiron Iruñeko alkateak (EH Bildu) adierazi du Iruñean terrorismoaren biktimak gogoratzeko egingo diren omenaldietara joateko asmoa duela, "betiere, senideak kontra ez badaude".

"Oso bortitzak izan ziren gatazken garaiak pairatu dituzten biktimekin egotea betebeharra" da, Radio Euskadik egindako elkarrizketa batean adierazi duenez, Europa Pressen arabera.

Bestalde, Joxe Mari Korta ETAk hildako enpresaburuaren omenaldian EH Bilduk izandako jarreraren inguruan galdetuta, Asironek onartu egin du ez dituela "xehetasunak" ezagutzen, baina Iruñea aldeko "kasuren batean", horren hitzetan, "zenbait sektore aurka agertu dira edo oztopoak jarri dituzte" omenaldietara joan direnean.

"Gure betebeharra, egoera berri honetan, gatazken garaian Euskal Herrian sufritu duen pertsona guztiekin egotea da. Sufritu dutenekin egon behar dugu beti", esan du. "Oso urte bortitzak bizi izan ditugu, eta gizarteak bi noranzkoko indarkeria jasan behar izan du, indarkeria mota asko izan baitira", gaineratu du.

Ez dituzte zezenketak debekatuko

Horrez gain, Asironek adierazi du "zentzugabekeria" litzatekeela Iruñean zezenketak galaraztea, Donostian entzierroa ezartzea bezala. Hori dela eta, ez da zezenen ikuskizunak debekatzearen aldekoa, eta herri bakoitzean "tradizioak euren neurrira" egin beharko liratekeela azaldu du.

Aipatutako elkarrizketan, Nafarroako hiriburuko alkateak esan du zezenzalea dela "uztailaren 7tik 15ra", San Fermin jaietan, baina urtean zehar ez dela zale amorratua adierazi du. "Gaztea izan naiz, eta askotan ikusi ditut zezenketak nire lagunekin, eta ondo pasatu dut. Bonua daukat orain dela 33 urtetik", gaineratu du.

Azkenik, Asironen iritzian, debekua ez da Iruñeko gizartearen lehentasunetako bat, eta "dekretu bidez entzierroa, entzierrilloa eta zezenketak debekatuko bagenituzke, sanferminak errotik berrantolatu beharko genituzke".