Aznarrek salaketa jarriko du, bere zerga datuak ezagutaraztea egotzita

Jose Maria Aznar Espainiako Gobernuko presidente ohiak iragarri du salaketa aurkeztuko duela Estatuko Fiskaltza Nagusiaren aurrean, "zerga datuak ezagutarazi izana" leporatuta. Izan ere, joan den astean, Ok diario egunkariak publikatu zuen Zerga Agentziak 70.000 euroko isuna ezarri ziola agintari ohiari, zergak ez ordaintzeagatik.

Aznarren esanetan, salaketaren helburua da "zerga-emaile guztiek duten konfidentzialtasun eskubidea defendatzea".

Presidente ohiak azaldu du Ogasunarekin "irizpide desadostasunak" izan dituela, baina hori ez dela "iruzurra" izan.

Ok diario egunkariaren arabera, Aznarrek elkarte instrumental bat erabili zuen, zergak ordaintzea saihesteko.

Horren ildotik, Cristobal Montoro Ogasun ministroak adierazi zuen Zerga Agentziak berdin tratatzen dituela pertsona guztiak, eta ohikoa dela zerga-emaileei azterketak egitea.