Politika -
MANIFESTAZIOA GASTEIZEN
Sarek deitutako martxara batu dira ELA, LAB, CCOO, ESK eta STEILAS
Datorren larunbatean izango da manifestazioa Gasteizen, 12:30ean, 'Gu gara gakoa' lelopean. Gaixotasun larria duten presoak askatzea eskatuko dute.
AGENTZIAK | ERREDAKZIOA
ELA, LAB, CCOO, ESK eta STEILAS sindikatuek bat egin dute Sare herri plataformak larunbaterako deitu duen manifestazioarekin. "Pertsona ororen osasunerako eskubidea eta osasun asistentzia duin bat izateko eskubidea" aldarrikatuko dute, 12:30ean Leizaola plazatik abiatuko den martxaren bidez.
Sarek gogora ekarri duenez, egun, 10 euskal preso daude larri gaixo. Larunbatean, bereziki, Jose Ramon Lopez de Abetxuko preso gasteiztarra izango dute gogoan: etxetik 420 kilometrora dago preso, eta bihotzeko gaitz larria du.
"Gaixo dauden presoak, pertsonak izateagatik soilik, beraien osasun eskubidea aitortua eta errespetatua izan behar dute, pertsona horiek tratu duin eta humanoa jasotzeko eta osasun asistentzia egokia izateko eskubidea dute, nahiz eta preso egon. Beraz, eskubide berberak izan behar dituzte gainontzeko pertsona gaixoek duten bezala, gaixotasunaren bilakaeran", esan du Sarek.
Presoen eskubideen defentsan, larunbateko 'marea horira' batzeko deia egin die Sarek herritarrei.
