EAJk justizia eskatu du Aldana tabernaren kontrako atentatuaren biktimentzat

EAJk memoria eta justizia aldarrikatu ditu Alonsotegiko Aldana tabernaren kontrako atentatuaren biktimentzat. Geroztik 38 urte igaro diren arren, egileek zigorrik gabe jarraitzen dutela salatu du Mikel Legarda diputatu jeltzaleak Espainiako Gobernuaren kontrol saioan.

1980ko urtarrilaren 20an gertatutako atentatuan lau pertsona hil ziren: Manuel Santacoloma, Liborio Arana, Mari Paz Ariño eta Pacíficoa Fika, eta beste 10 lagun zauritu ziren, oraindik ere argitu ez den atentatu batean.

Mikel Legarda EAJko diputatuak salatu duenez, "38 urte geroago" eta Juan Ignacio Zoido Espainiako Barne ministroak gaurko osoko bilkuran baieztatu duenez, ez dago atentatu horri buruzko daturik. "Badirudi ministroari ez zaiola axola horri buruzko artxiborik ez egotea", kritikatu du Legardak. Ez hori bakarrik, dokumenturik zergatik ez dagoen jakiteko Barne Ministerioak ikerketa bat abiatuko zuela iragartzea espero zuela adierazi du, baina egin ez duela ikusita, jeltzaleek eskatuko diotela.

Estatu terrorismoari lotutako GAE (Grupos Armados Españoles) talde ultraeskuindarrak hartu zuen bere gain atentatua. Legardak bere hitzaldian emandako azalpenen arabera, Jose Amedo poliziari agindu zioten ikerketa, hain zuzen ere, Segundo Mareyren bahiketagatik eta Consolation eta Batzoki tabernen kontrako atentatuengatik 117 urteko kartzela zigorra ezarri zioten pertsona bera.

"Ministro jauna, uste al duzu atentatu hori argitzeko aukerarik zegoela Amedo tartean izanda eta ustezko egileak Barakaldoko polizia-etxeko kideak zirenean?" galdetu du Legardak.

"Biktimei eta horien senideei ez diete informaziorik eman eta memoria eta justizia merezi dute. Hori dela eta, atentatu horri lotutako informazioaren desagerpena argitzeko ikerketa bat eskatuko dio talde jeltzaleak Barne Ministerioari.