Erabakitzeko eskubidearen inguruko galdeketaren hautetsontziak iritsi dira Donostiara

Gure Esku Dagok 80 hautetsontzi jaso ditu igande honetan, Gipuzkoako hainbat herri eta hiritan egindako galdeketetatik, eta Donostiako 37 puntutan jarriko ditu, azaroaren 18an Gipuzkoako hiriburuan deitu duen galdeketarako.

Donostia izango da hautetsontziak kalera aterako dituen lehen euskal hiriburua; Irunen, Balmasedan, Zallan eta Alonsotegin ere egingo da kontsulta. Hautetsontziak jai giroan hartu dituzte, Aquariumean. Aurretik kalejira egin dute Boulevarden; 12:30ean hasi da.

Igande honetan hautetsontziak hamalau auzo hauetara eraman dituzte: Amara, Amara Berri, Aiete, Alde Zaharra, Altza, Antiguo, Añorga, Bidebideta, Egia, Centro, Gros, Intxaurrondo, Loiola eta Martutene.

Ivan Rosales Gure Esku Dagoko bozeramaileak azaldu duenez, astelehen honetatik aurrera aldez aurretik bozkatzeko aukera izango dute azaroaren 18an egin ezingo dutenek, Gure Esku Dago plataformak Euskal Herria kalean duen tokian.

Rosalesek esan du Gure Esku Dago "motorrak berotzen" ari dela Gipuzkoako hiriburuko hitzordurako. Herritarrek "baietz edo ezetz" erantzun ahalko diote honako galdera honi: "nahi al duzu euskal herritarrok gure etorkizun politikoa geure kabuz eta aske erabakitzea?".

Argazkia: Gure Esku Dago

Haren ustez, partaidetza datua "ez da garrantzitsua", "hautetsontziak kalera ateratzea erronka benetan inportantea" delako ekimena antolatu duen "herritar taldearentzat", eta "pozik" dagoela bozketa Donostian egiteagatik gaineratu du.

150.000 bat donostiarrek izango dute haien iritzia emateko aukera. Orain arte antolatutako 203 galdeketetan 189.000 pertsonak bozkatu dute. Gure Esku Dagok 2016an hasi zuen galdeketen zikloa.

Argazkia: Gure Esku Dago