Araban atxilotutako bi gazteak espetxera bidali ditu Auzitegi Nazionalak

Ostegunean, Gasteizen eta Amurrion (Araba) atxilotutako bi gazteak espetxera bidali ditu Maria Tardon Auzitegi Nazionaleko epaileak, substantzia leherkor, sukoi edo su-eragileak izatea egotzita.

Ertzaintzak bideratu zuen ikerketa. Bi gazteak 2014an eta 2015ean egindako kale-indarkeria ekintza ezberdinekin lotzen ditu Ertzaintzak.

25 eta 26 urteko bi gazteen hatz-markak eta beste zantzu batzuk Dura herri txikian agertu zen bidoi batean aurkitu zituztela azaldu zuten ikerketako iturriek ostegunean. Bidoian material piroteknikoa eta erasoetan erabilitako beste tresna batzuk topatu zituzten ikertzaileek.

Bi gazteen etxebizitzak miatu zituzten ostegunean, eta biak Auzitegi Nazionalaren esku geratu ziren. Ikerketako iturrien arabera, gazteetako bat 2016ko maiatzean, Amurrion,  atxilotu zuen Guardia Zibilak terrorismoa goratzea leporatuta.