Politika -
Ezker abertzalea
Gorenak Sorturi buruzko ebazpena jakinaraziko die gaur aldeei
Autoaren edukia filtratu egin zieten atzo hainbat egunkariri, eta beraz, Sortu legeztatzearen alde dauden zazpi epaileek sinatuko duten boto partikularraren argudioak ezagutzea baino ez da falta
Erredakzioa
Auzitegi Goreneko 61. artikuluko areto bereziak 13:00etarako deitu ditu gaur Sorturen aurkako prozesuan aurkeztutako aldeak (Fiskaltza, Estatuko Abokatutza eta alderdi abertzalea bera), autoa jakinarazteko.
Autoaren edukia atzo bertan filtratu zieten egunkari batzuei, eta beraz, Sortu legeztatzearen alde agertu ziren zazpi epaileen argudioak ezagutzea baino ez da falta.
Zazpiek boto partikular bakarra sinatuko dute, eta Juan Antonio Xiol Arlo Zibileko Aretoaren presidenteak idatzi du.
Beste sei epaileen artean Auzitegi Goreneko beste bi areto-presidente daude: Jose Manuel Sieira (administrazioarekiko auzien arlokoa) eta Gonzalo Moliner (sozial arlokoa).
Sortu legeztatzea errefusatzen duen autoaren arabera, ETAk "eratu, sustatu eta zuzendu" egin zuen ezker abertzalearen alderdi berria sortzeko prozesua, "indarkeriaren arbuioa barne".
Nolanahi ere, lehen aldiz, epaileek ez zuten erabakia aho batez hartu, eta gehiengoa oso estua izan zen (bederatzi epaile Sorturen aurka, eta zazpi alde).
Gaurtik zenbatzen hasita, Sortuk 30 eguneko epea izango du Auzitegi Konstituzionalean helegitea aurkezteko.
