Errefuxiatuei laguntzeko deia egin dute Gernikako bonbardaketaren 82. urteurrenean

Gernikak gerratik ihesi alde egin duten errefuxiatuei laguntzeko eskatu du herria suntsitu zuen bonbardaketaren 82. urteurrena oroitzeko ekitaldietan.

Horixe aldarrikatu dute Gernikako XV. Bake eta Adiskidetze Sariak emateko ekitaldian. Aurtengoan Christos Stylianides Giza Laguntza eta Krisi Kudeaketako komisario europarrari eta hiru historialariri eman dizkiete sariak: Paul Preston hispanista, Angel Viñas katedratikoa eta Xabier Irujo Nevadako (AEB) unibertsitateko euskal ikasketen zentroko zuzendariari.

Stylianidesek ezin izan du saria bertan jaso, baina bideo baten bitartez eskertu du "ohore eta umiltasun handiz" jasotzen duen saria, eta "bake eta bizikidetzaren sinbolo unibertsal" bihurtu den herri batek emana izan dela azpimarratu du.

"Iraganeko akatsak ez errepikatzea" eskatu ostean, gerraren aurkako "ahotsak batzea" aldarrikatu du, eta bizitza arriskuan jarriz "bizitzak salbatzen" dituzten horiei eskaini die saria.

"Harro nago, gure Europar Batasuna delako mundu mailan giza-laguntzaren buru. Erronkak erronka, nire konpromisoa ahulenei laguntzeko bidean jarraitzea eta bakea eta bizikidetza sustatzea izango da", gaineratu du.

Lucas Gonzalez-Ojeda Europako Batzordeak Espainiako Estatuan duen ordezkariak jaso du saria Stylianidesen partez, eta berretsi egin du Europar Batasunak mundu mailan "giza-laguntza emateko konpromisoa" duela.

Jose Maria Gorroño Gernikako alkateak minutuko isilunea eskatu du ihesean hil diren errefuxiatuen omenez, eta Europar Batasunari eskatu dio gerratik edo desberdintasun sozioekonomikoetatik alde egiten dutenen aldeko laguntza indartzeko.

Gainera, bonbardaketaren 82. urteurrenaren ekitaldien harira, publikoarentzat ireki dute herriko enpresek langileak ezkutatzeko Gerra Zibilean erabiltzen zuten babes-lekua.

Alemaniako nazien eta Italiako faxisten hegazkinen bonbardaketa hasi zela iragarri zuten sirena hotsak errepikatu dira gaur arratsaldean, eta lore-eskaintza egingo diete biktimei hilerrian.

Bonbardaketan hildako pertsonen omenaldia eta lore-eskaintza Zalloko hilerrian izan da, eta alderdi politikoetako eta erakundeetako ordezkariak ere bertaratu dira.

Gero, udaletxean, Mikel Ayestaranek I. George L.Steer/Gernika Bakearen aldeko Kazetaritzaren Saria jaso du. Gainera, omenaldia egingo diote Gernikako bonbardaketa The Times egunkarian kontatu zuen kazetari hegoafrikarrari, bere omenezko eskulturan.

Eguna amaitzeko, 21:00etan, ibilbide isila egingo du kandelekin Foru plazatik abiatuta.