Politika -
Hauteskunde orokorrak
Ciudadanosen aurka Errenterian izandako protestak ikertuko ditu Fiskaltzak
Salatutako gertakariak argitzeko ikerbidea hasi du Ministerio Publikoak. Gertatutakoa ezker abertzaleari leporatu zion Ciudadanosek.
Agentziak | Erredakzioa
Ciudadanosen aurka Errenterian, apirilaren 14an, izandako protestak mehatxu, irain eta gorroto delitu bat ote diren argitzeko ikerketa martxan jarri du Gipuzkoako Fiskaltzak. Alderdi laranjak hauteskunde kanpainako ekitaldi bat egin zuen bertan.
Fiskaltzak idatzi batean jakinarazi duenez, salatutako gertakariak argitzeko ikerbidea hasi du Ministerio Publikoak. Gertatutakoa ezker abertzaleari leporatu zion Ciudadanosek.
Hiru egun geroago, Albert Rivera Ciudadanoseko buruzagiak salaketa aurkeztu zuen Fiskaltzaren aurrean, EH Bildu eta Sortu protesten atzean zeudela argudiatuz. Ekitaldian, besteak beste, Riverak eta Maite Pagazaurtundua Europarako hautagaiak parte hartu zuten.
Apirilaren 14an dozenaka pertsonak Ciudadanosen aurka protesta egin zuten Errenteriako Foruen plazan.
Ertzaintzaren dispositibo handi batek manifestariak ekitaldi politikora hurbiltzea eragotzi zuen, eta ertzainek manifestarien kontra kargatu zuten.
