Politika -
IAT auzia
Bartzelonako Auzitegiak hirugarren gradua eman dio Oriol Pujoli
Generalitateko Oriol Pujoli emaniko erregimen irekia babestu du Bartzelonako Auzitegiak. Izan ere, espetxe-zaintzako epaileak atzera bota zuen Generalitatearen erabakia.
AGENTZIAK | ERREDAKZIOA
Generalitateak Oriol Pujol CDCko buruzagi ohiari martxoan aitortutako erregimen irekia atzera bota zuen gero espetxe-zaintzako epaileak. Orduan, Generalitateko Barne Sailak lanera joateko espetxetik ateratzeko baimena eman zion. Oriol Pujolen defentsak, bere aldetik, helegitea aurkeztu zuen eta orain Generalitateak martxoan aitortutako erregimen irekia babesteko erabakia hartu du Bartzelonako Auzitegiak.
Iragan martxoan erregimen irekia aitortu zion Generalitateak Oriol Pujoli, IAT kasuan komisioak kobratzeagatik ezarritako bi urte eta erdiko kartzela zigorra betetzera espetxean sartu eta bi hilabetera. Fiskaltzak helegite jarri zuen eta espetxe-zaintzako epaileak erabakia atzera bota zuen.
Gerora, maiatzean, Justizia Sailak astean zehar lanera joateko eta gizarte laneko boluntario jarduerako egiteko kartzelatik irtetea baimendu zion.
Praktikan, baimen hori hirugarren graduaren oso antzekoa da. Erregimen irekian, orain astelehenetik ostiralera soilik egin beharko du lo espetxean eta ez asteburuetan orain arte bezala.
Bartzelonako Auzitegiaren autoan epaileak azpimarratzen duenez, zazpi urte igaro dira Oriol Pujolek delituak egin zituenetik, 76.000 euroko isuna ordaindu du eta kartzelan influentzia trafikoa edo eroskeria delituak prebenitzeko tratamenduan parte hartu du.
