Politika -
Bilboko udaletxea
Gonzalezek (PP) ez du oraingoan toparik egin, 'irudi mingarriak saihesteko'
Bilboko Udaleko bozeramaile guztiek kopak altxatu dituzte, PPkoak izan ezik. Horrela, iragan asteko brindisaren argazkiak sortutako polemika saihestu nahi izan du Gonzalezek.
Agentzia | Erredakzioa
Raquel Gonzalez Bilboko PPren bozeramaileak ez du Juan Mari Aburto alkatearekin eta EAJ, PSE-EE, EH Bildu eta Elkarrekin Podemoseko gainerako bozeramaileekin toparik egin ostiral honetan, "irudi mingarriak saihesteko".
2020ko aurrekontuak behin betiko onartu dituzte urteko azken Udalbatzan. Bilboko udaletxeko arabiar aretoak Udalbatzaren, zinegotzi guztien eta komunikabideen Gabonetako brindis tradizionala hartu du ondoren.
Alkatea, Nekane Alonso (EAJ), Alfonso Gil (PSE-EE), Jone Goirizelaia (EH Bildu), Ana Viñals (Elkarrekin Podemos) eta Raquel Gonzalez (PP) bozeramaileak elkartu dira argazkian.
Bozeramaile guztiek kopak altxatu dituzte, PPkoak izan ezik. Horrela, iragan asteko brindisaren argazkiak sortutako polemika saihestu nahi izan du Gonzalezek. Bizkaiko PPko presidenteak gainerako bozeramaileekin batera, Jone Goirizelaia barne, topa egin zuen iragan astean.
Gaurko argazkiaren ostean, "ez diot leku batean egoteari utziko nahiz eta deserosoa izan", adierazi du Raquel Gonzalezek komunikabideen aurrean.
"Gure ideiak defendatzeari eta bilbotar guztiengatik ozen hitz egiteari utziko ez diot", esan du. "Demokraziaren arauek beste alderdiekin espazio publikoak partekatzera behartzen gaituzte, gustatu ala ez, baina, mingarriak izan daitezkeen irudiak jakinda, saihesten saiatuko gara, gure asmoa inori min ematea sekula izan ez delako", erantsi du.
