Politika -
Faisan auzia
Rubalcabak uste du 'akats juridikoak' daudela Faisan auzian
PSOEko hautagaiak esan du ez dela "ezertaz" damutzen, eta auzia existitzen bada, bera hautagai delako dela gaineratu du.
Erredakzioa
Alfredo Perez Rubalcaba PSOEko presidentegai eta Espainiako Gobernuko Barne ministro ohiak adierazi du argudio nahikoak daudela Faisan auzian "akats juridikoak" direla usteko.
Nolanahi ere, Rubalcabak ez du sakondu nahi izan argudio horretan.
Atzo, Pablo Ruz Auzitegi Nazionalak hiru poliziaburu auzipetu zituen, ETAri laguntzea egotzita. Hain zuzen ere, atxiloketa bat saihesteko erakunde terrorista ohartarazi izana leporatzen diete.
RNEn egindako elkarrizketan, Rubalcabak berretsi du auzi hau ez zela existituko bela Barne ministro izan ez balitz, eta gogorarazi du polizia operazioa bigarrenean gauzatu zutela eta ETAko ustezko kide guztiak atxilotu zituztela.
"Hau existitzen bada, ni existitzen naizelako eta hautagai naizelako da", nabarmendu nahi izan du,
Rubalcabak gaineratu du ez dela "ezertaz" damutzen, eta salatu du PPk jakin badakiela berak ez duela zerikusirik Faisan auziarekin, Barne Ministerioan etorri berri baitzen gertatu zenean.
Halaber, defendatu egin du Antonio Camacho garai hartako Segurtasun estatu idazkaria (egun Barne ministro da), eta PPk lekuko gisa deklaratzea eskatu badu ere, epaileak errefusatu egin duela ekarri du gogora.
