Ibarra: "Baliteke atzerrian dauden herritar batzuk botoa eman ezinda geratzea"

Juan Luis Ibarra EAEko Justizia Auzitegi Nagusiko eta Hauteskunde Batzordeko presidenteak esan du uztailaren 12ko hauteskundeetan "segurua" izango dela aurrez aurreko bozketa. Osasun eta Segurtasun sailarekin batera "hauteskunde egoitzan botoa eman arte" izan daitezkeen arazoak bilatu eta "bakoitzarentzat" irtenbidea aurkitzen saiatzen ari direla azpimarratu du. Hala ere, "ezkor" agertu da atzerriko boto-emaileen kasuan: "Arazoak egongo dira, nazioarteko posta zerbitzua etenda dago Ertamerikako eta Hegoamerikako herrialde batzuetan". Horregatik, atzerrian bizi diren herritar batzuk botoa eman gabe gera litekeela ohartarazi du.

Radio Euskadin egin dioten elkarrizketa batean hauteskunde kanpaina laburtzeko aukeraz galdetuta, erantzun du "alderdien erabakia" dela eta "legez" ezin dela aldatu, 15 egun direla, "baina akordio batera iritsita kanpaina egunak murriztu" ditzaketela.

Ibarrak erretiroa hartuko du ekainaren 21ean, eta esan du ahoko zapore "gazi-gozoarekin" joango dela. Hala ere, argi du: "judikaturan egon naizen 32 urteetan, egun batean ere ez dut pentsatu gaizki aukeratu nuenik". Horregatik, azaldu du egun guztiak ez direla zoriontsuak izan, baina "merezi" izan duela. Izan duen ibilbidea errepasatuz, gogorarazi du bizkartzaina izan zuela 1994tik 2014ra, eta urtetako gogoetaren ostean, badakiela ez zela egon "ETA on bat eta txar bat". Baieztatu du "hainbat hautagaitza" egongo direla bere postua hartzeko, eta ekainaren 4tik aurrera aurkeztu ahal izango dituztela; baina ez du izenik aurreratu.

Gainera, COVID-19aren krisiagatik ezarritako alarma egoerari buruz, esan du "konfinamendua urratzeagatik ezarritako milioi bat salaketen %10 ere ez" direla iritsiko, portaera guztiek ez dutelako zigorra ekartzen.

31:33

(Radio Euskadin idatzitako eta eitb.eus-en erredakzioan itzulitako albistea)