Politika -
Koronabirusa
M8ko manifestazioak pandemiaren hedapenarekin lotu nahi zituen auzia artxibatu dute
Epaileak ebatzi duenez, Espainiako Gobernuak Madrilen duen ordezkariak ez zuen arriskuaren "ezagutza egiazkoa, objektiboa eta teknikoa" izan manifestazioak baimendu zituenean.
Agentziak | Erredakzioa
Martxoaren 8ko manifestazioak ez debekatzeagatik ustezko prebarikazio delitua egin izana egotzita Jose Manuel Franco Espainiako Gobernuak Madrilen duen ordezkaria ikertu duen epaileak, auzia behin-behinean artxibatzea erabaki du, ez duelako delitu zantzu nahikorik ikusi.
Epaileak, asteotan egindako ikerketa-eginbideen ostean ebatzi duenez, "Espainiako Gobernuak Madrilen duen ordezkariak ez zuen pertsonen osasunerako zekarren arriskuaren ezagutza egiazkoa, objektiboa eta teknikoa izan martxoaren 5etik 14ra bitarteko manifestazioak eta elkarretaratzeak baimendu zituenean".
Testuinguru horretan, Francok "ez zuen horri buruzko komunikazio edo instrukziorik jaso, eta osasun arloko agintariei ez zien horren inguruko informazioa ofizioz eskatu".
Epaileak gaineratu duenez, "Espainiako Gobernuak Madrilen duen ordezkariari pertsona fisiko edo juridiko, publiko zein pribatu, bakar bat ere ez zion eskatu elkarretaratzeak edo manifestazioak debekatzeko, edo nolabait mugatzeko, COVID-19aren agerraldiagatik".
Gauzak horrela, M8ko manifestazioak pandemiaren hedapenarekin lotu nahi zituen auzia behin-behinean artxibatzea erabaki du ostiral honetan.
Epaileak, Francori entzun eta gero hartu du erabakia; izan ere, ikertu gisa deklaratzera joan zen asteazkenean, eta 18 lekukok ere epailearen aurrean deklaratu zuten, besteak beste, manifestazioak eta elkarretaratzeak bertan behera uzteko eskatuz deiak jaso zituzten 10 antolatzailek.
Dena dela, helegitea aurkeztu daiteke Madrilgo Probintzia Auzitegian.
