Politika -

KATALUNIA

16 atxilotu Bartzelonan eta Gironan, CDRek deitutako mobilizazioen osteko istiluetan

Urriaren 1eko erreferendumaren hirugarren urteurrenean, CDR Kataluniako Errepublikaren Aldeko Komiteak manifestazioak deitu ditu. Horiek bukatutakoan istiluak sortu dira eta Mossoek kargatu egin dute.

Esquadra Mossoak manifestari bat atxilotzeko unean, Bartzelonan. Argazkia: EFE
Esquadra Mossoak manifestari bat atxilotzeko unean, Bartzelonan
Esquadra Mossoak manifestari bat atxilotzeko unean, Bartzelonan. Argazkia: EFE

AGENTZIAK | ERREDAKZIOA

Whatsapp Facebook Twitter Telegram Email

Gutxienez 16 pertsona atxilotu dituzte bart Katalunian, 15 Bartzelonan eta bat Gironan, urriaren 1eko erreferendumaren hirugarren urteurrenaren harira deitutako mobilizazioen ostean izandako istiluetan. Eguna lasaia izan da, baina iluntzean, CDR Kataluniako Errepublikaren Aldeko Komiteak deituta egin diren manifestazioen ondoren, hainbat edukiontzi erre dituzte eta Esquadra Mossoak manifestarien aurka oldartu dira.

CDRek antolatutako mobilizazioen ondoren gertatu dira istiluak. Bartzelonako mobilizazioa 20:00etan hasi da, Sant Jaume plazan. Ehunka lagun elkartu dira bertan, alderdi independentistei "Urriaren 1eko mandatua" betetzea eta Kataluniaren independentzia gauzatzea eskatzeko.

Kontzentrazioa Generalitatearen Jauregiaren aurrean egin da, Esquadra Mossoen dispositibo handi bat inguruan zela, eta manifestariek JxCat, ERC eta CUPeko diputatuen argazkiak zituzten kartelak eta "Herriaren agindua betetzeko aukeratu naute" zioten mezuak zabaldu dituzte.

Manifestariak Via Laietanarantz joan dira eta Espainiako Poliziak duen egoitzaren aurrean bildu dira. Manifestari talde txikiak Katalunia Plaza, Rambla Catalunya eta Ronda Sant Pere aldera joan dira gero, eta han barrikadak jarri eta edukiontziak erre dituzte.

Azkenean, Mossoek esku hartu dute manifestariak sakabanatzeko. Gironan, berriz, CDRek deitutako manifestazioa atxilotu batekin amaitu da, edukiontziak erre eta Espainiako Gobernuaren Ordezkariordetza babesten zuten polizien aurka suziriak jaurti ostean.

Hau zure interesekoa bada, baliteke beste gai hauek ere izatea
Katalunia Politika Bartzelona argazkiak Kataluniako erreferenduma Eguneko albisteak Albisteak