Politika -
KORONABIRUSA
Euskadiko COVID datuei buruz "gezurra esatea" leporatu dio Urkulluk Casadori
100.000 biztanleko 500 kutsatu baino gehiago dituela Euskadik idatzi zuen larunbatean PPko buruzagiak Twitterreko bere kontuan. Gaur Urkulluk erantzun dio hori ez dela horrela: 261,88 direla.
AGENTZIAK | ERREDAKZIOA
Iñigo Urkullu lehendakariak Euskadiren COVID datuei buruz "gezurra esatea" leporatu dio Pablo Casado PPren presidenteari. Izan ere, atzo txio polemiko bat idatzi zuen Espainiako popularren buruak, Euskadik 100.000 biztanleko 500 kutsatu baino gehiago zituela adieraziz, eta beraz, Madrilekin geratzen ari denarekin konparatuta, "mesede" egiten ari zitzaiola Espainiako Gobernua.
Horren aurrean, sare sozialen bidez erantzun dio Urkulluk ere eta "benetako datua" 100.000 biztanleko 261,88 kutsaturena dela adierazi dio.
"Ezin dut onartu Euskadiko datuekin etengabe gezurretan ibiltzea" deitoratu du Urkulluk, "utzi iezaiozue koronabirusarekin eta Euskadirekin politika egiteari" izenburupean argitaratu duen oharrean.
EAErekin batera, Nafarroak ere 100.000 biztanleko 500 kutsatutik gora dituela salatu zuen Casadok bere argitalpenean eta ia 24 ordu beranduago, Twitterren duen kontu pertsonalean lehen txioa izaten jarraitzen du, espresuki horrela izateko izendatu duelako.
"EAEn 100.000 biztanle baino gehiago dituen inongo udalerri ez dago 500eko zifra horren gainetik" berretsi du Urkullu lehendakariak eta hiru hiriburuen datuak eman ditu: 100.000ko 287,2 kutsatu Gasteizen, 214,8 Bilbon eta 259,2 Donostian.
