Nafarroan lortutako "adostasun zabala" eskertu dute Sarek eta Etxeratek

Sarek eta Etxeratek eskerrak eman dituzte Nafarroako Foru Erkidegoan lortutako “adostasun politiko eta sindikal zabalagatik”, Nafarroako presoak Iruñeko espetxera hurbil ditzaten.

Atzo Nafarroako Parlamentuan lortutako “akordio zabala” nabarmendu dute, zeinaren arabera, Espainiako Gobernuari, hala eskatzen duten presoei, beren errotze sozial eta familiarreko lekuetatik gertu zigorrak bete ahal izatea errazteko eta zigorra Iruñeko espetxean bete dezaten plan bat egiteko eskatzen duen.

PSN, Geroa Bai, EH Bildu, Podemos Nafarroa eta Ezkerraren botoekin onartu zuten ebazpena, eta ondoren sindikatu guztiek sinatu dute akordioa, hau da, CCOO, UGT, ELA, LAB, Steilas, ESK, Solidari, Hiru, EHNE, CNT eta CGT sindikatuek.

Ebazpen “garrantzitsu” honek, “zalantzarik gabe, Parlamentuan proiektatzen den errealitate politiko baten argazkia islatzen du”, eta horri “Nafarroako eragile sindikalen erabateko konpromisoa gehitzen zaio”, azpimarratu dutenez. “Honi salbuespenezko espetxe-politika behin betiko gaindi dadin Nafarroako gizartearen bultzada gehitzen zaio”, erantsi dute.

Era berean, Foro Sozialak akordio hau lortzeko egin duen lana eskertu dute Sarek eta Etxeratek. Biek “garrantzi handiko ekimen hau egiten den unearen garrantzia” nabarmendu dute; izan ere, mobilizazio sozialak, ekimen sozial eta instituzional guztiek eta Nafarroan, EAEn, Ipar Euskal Herrian, Espainiako eta Frantziako estatuetan eta nazioartean “egindako lanak, zalantzarik gabe, espetxe-salbuespenaren amaieran behin betiko bultzada ematen lagunduko dute”.

Etxeraten eta Sareren azken balantzearen arabera, soilik bi preso nafar daude Iruñeko espetxean: Josetxo Arizkuren Ruiz y Xabier Perez Aldunate. Nafarroako beste 22 preso Espainiako estatuko kartzeletan daude, horietako bat larri gaixorik, Iñaki Etxeberria Martin (Topas, Salamanca). Beste zazpi preso nafar Frantziako estatuko espetxeetan daude, horietako larri gaixorik, Jon Gurutz Maiza Artola (Lannemezan).