PPren gehiengoa 'itogarria' izan litekeela agertu dio EAJk erregeari

Josu Erkoreka EAJk Kongresuan duen bozeramaileak "kezka" agertu dio Juan Carlos I.a Espainiako erregeari. Izan ere, bere ustez, "PPren gehiengo boteretsua itogarria izan liteke oposizio eragingarria egiteko".

Erregea ordubetez batzartu da Erkorekarekin Zarzuelan, inbestidura saiorako hautagaia proposatzeko abiatutako bilera-sortaren baitan.

Erkorekaren esanetan, bilera "adeitsua" izan da, eta "batik bat" inbestidurari buruz hitz egin dute, baina egoera ekonomikoa eta ETAren amaiera ere aipatu dituzte.

Bileraren ostean egindako prentsaurrekoan, bozeramaile jeltzaleak azaldu du oraindik ez dutela erabaki zer bozkatu Mariano Rajoyren inbestiduran, PPk ez baitu oraindik deitu, baina alde bozkatzea ia guztiz baztertu du.