Politika -

Bizikleta martxa

Sare: "Aurrerantz goaz, urruntze politikarekin amaituz, baina bide luzea dago egiteko oraindik"

Plataforma horren bozeramaileak nabarmendu duenez, "bide luzea dago egiteko oraindik, euskal preso guztiak hemen egon arte". Halaber, "garai lazgarri bati amaiera ematea" lortu izana txalotu du

Sarek antolatu duen bizikleta martxaren amaiera. Argazkia: @gurearterasare
Sarek antolatu duen bizikleta martxaren amaiera. Argazkia: @gurearterasare
Sarek antolatu duen bizikleta martxaren amaiera. Argazkia: @gurearterasare

Agentziak | EITB Media

Whatsapp Facebook Twitter Telegram Email

Amaitu da presoen hurbilketaren alde Sare herritarrak, presoen eskubideen defentsan lan egiten duen plataformak, egin duen bizikleta martxa. Larunbat honetan heldu dira Donostiara, eta, Joseba Azkarraga Sareko bozeramaileak adierazi duenez, "aurrerantz goaz, blokeoak eraitsiz eta urruntze politikarekin amaituz, baina asko falta da oraindik salbuespen legediarekin amaitzeko".

Alderdi Ederren egindako ekitaldian, "leku askotan pertsona askok egindako ekintza txiki askok gauzak alda ditzaketela" azpimarratu du Sarek, herritar askok erakusten ari diren moduan. Ildo horretatik, "Euskal Herrian elkarbizitzarantz eta benetako bakerantz aurrera egiteko aldaketarako motorra" direla esan du.

"Aurten ere, ehunka kilometro, ehunka pertsona, Hegoaldeko zati handi bat zeharkatu dute, eta emandako pedalkada bakoitzarekin; kalean edo mendian egindako urrats bakoitzarekin, etxera bueltatzeko bideari ekiteko aldarrikatu dute, euskal presoek itzultzeko eskubidea baitute".

Azkarragak nabarmendu duenez, "bide luzea dago egiteko oraindik, euskal preso guztiak hemen egon arte". Halaber, "garai lazgarri bati amaiera ematea" lortu izana txalotu du, "presoen eta horien senideen eskubideen urraketa izan baita jasan dugun jarrera errepresiboena".

Testuinguru horretan, "beste etapa batzuk egiteke" daudela azaldu du. "Gaur egun Dueñasen, Mansillan, Aragoin edo Madrilen dauden presoak ekarri behar ditugu", azpimarratu du, eta "guztion artean" egin beharreko lana dela gaineratu du, erakundeak, alderdiak, sindikatuak eta herritarrak aipatuz.

Gainera, urruntze politikarekin batera, salbuespeneko espetxe-politikari ere amaiera eman behar zaiola azpimarratu du: "Graduen progresioaren blokeoarekin amaitu behar da; baimenak eta gradu-progresioak blokeatzen dituen justiziaren jarrerarekin; 40 urtera arteko espetxealdia ahalbidetzen duten legeekin; edo Frantziako espetxeetan emandako denbora kontuan izatea eragozten duten beste legeekin".

Hau zure interesekoa bada, baliteke beste gai hauek ere izatea
Politika Bilbo Donostia Iruñea Bizkaia Gipuzkoa Nafarroa Araba Euskal Autonomia Erkidegoa Delituak Presoak ETA Gizartea Eguneko albisteak Gasteiz Albisteak Espetxeak Terrorismoaren Biktimak