Nafarroak ETAren amaieran 'ahotsa' izango duela esan du Rajoyk

Yolanda Barcina Nafarroako presidenteak esan duenez, Mariano Rajoy Espainiako presidenteak Nafarroak "ETAren amaierarekin zerikusia duen guztian ahotsa" izango duela hitz eman dio.

Yolanda Barcina eta Mariano Rajoy Moncloan bildu dira eguerdian, ordu eta erdi inguruko bileraren ostean agerraldia egin du Nafarroako Gobernuko presidenteak.

Barcinak Nafarroa beti ETAren jomugan egon dela adierazi dio Rajoyri, "hasteko eta behin, lurraldetasunagatik, eta ondoren, EAErekin batera Espainiarekiko independentzia eskatzeko".

"ETAren indarkeriagatik gehien sufritu duen erkidegoetako bat izan da, terroristen helburu nagusienetakoa", azpimarratu du Barcinak.

ETAk iragarritako indarkeriaren behin betiko amaiera Estatu demokratikoak eta segurtasun indarrek "lortutakoa" izan dela azpimarratu du Barcinak, baina erakundeak "beste pauso batzuk" ematea beharrezkoa dela azpimarratu du, besteak beste, bere "desegitea iragartzea". "Armak utzi behar dituzte", azpimarratu du Nafarroako Gobernuko presidenteak.