PPk PSEri: 'Gobernatzeko erabili geratzen zaizuen denbora apurra'

''Espainiako Gobernuari oposizio kaxkarra egin baino, geratzen zaizuen denbora apurra gobernatzeko erabili'', esan die sozialistei Iñaki Oyarzabal Euskadiko PPko idazkari orokorrak. Halaber, ''kezkatzeko moduko nagusikeri jarrera'' izatea leporatu die PSE alderdiko hainbat ordezkariri.

Ostegun honetan Eusko Legebiltzarrean egin ditu adierazpenok Oyarzabalek, PPk eta PSEk akordioa hautsi zutenetik egin duten lehen saioan. Bertan, aurkeztutako proposamenik gehienak aurrera ateratzea lortu dute sozialistek, tartean giza eskubide eta herritartasunerako hezkuntza irakasgaiaren aldeko bat. Hain zuzen ere, proposamen horren defentsak eragin ditu bi alderdien arteko ika-mika.

Hauteskunde orokorrak irabazi zituztenetik ''demokrazia, berdintasun eta osasun politiketan atzera pausoak'' eman izana leporatu die Vicente Reyes parlamentari sozialistak PPko kideei.

Salaketa horren aurrean, Oyarzabalek esan du PPko ordezakariek jasaten duten tratua ''onartezina'' dela. ''Hiru urte egin dituzue gobernatzen, jarrera onartezinekin. Inozo, baldar.. deitu gaituzue. Espainiako Gobernuari oposizio kaxkarra egin baino, geratzen zaizuen denbora apurra gobernatzeko erabili, eta ezin izan hain arduragabeko'', esan die sozialistei.