34 urte iraun duen urruntze politika atzean utzita, 'etxerako bidea'ri ekiteko garaia dela uste du Azkarragak

34 urteren ostean, urruntze politika amaitzetik gertu ikusten du Sarek, eta, horregatik, "etxerako bideari" hasiera emateko garaia dela uste du. Oraindik dozena bat preso daude Espainiako espetxeetan eta urruntzea 2023. urtearen hasieran amaitzea espero du, datozen asteetan edo bi hilabeteetan. Dena dela, Sareren arabera, urruntzea bukatzeak ez du esan nahi salbuespen politikak amaitu direnik. Horren adibide jarri ditu hirugarren graduak eskuratzeko zailtasunak eta 7/2003, 5/2003, eta 7/2014 legeak.

Larunbatean Bilbon presoen eskubideen alde egingo den manifestazioaren atarian, Joseba Azkarraga Sareko bozeramailea elkarrizketatu dute Radio Euskadiko "Boulevard" saioan.

Sareko ordezkariaren esanetan, urruntze politikaren amaiera posible izan da Gasteizko eta Iruñeko parlamentuetako gehiengo politikoei, batasun sindikalari eta herritarren mobilizazioari esker. Gaineratu duenez, gizartearen mobilizazioa ezinbestekoa izan da eta etapa berri honetan ere eragile garrantzitsua izango da. "Gobernuak ez dira mugitzen, mugitu egin behar dira", nabarmendu du.

Hori dela eta, larunbatean Bilbon (17:00) egingo den manifestazioan parte hartzeko deia egin du.

Datuak

EPPK kolektiboko 147 preso Euskal Herriko espetxeetan daude, horietatik ia erdiak Zaballan: 66. Aldiz, 14 preso daude Espainiako Estatuko espetxeetan, eta beste 12, ostera, Frantzian. Bat ez beste guztiak Lannemezanen daude, Euskal Herritik hurbilen dagoen espetxean.

Logo aldaketa

Atzo, Sarek eta Etxeratek irudi berria aurkeztu zuten urruntze politikaren amaiera gertu dagoela irudikatzeko. Logo berri horretan Euskal Herriko mapa eta "Euskal presoak Euskal Herrira" leloa desagertu dira. Geziak eta etxera hitza, ostera, mantendu egiten dira.