Politika -
Ukrainako gerra
Defentsa Ministerioa Zaragozako Leopardak prestatzeko lanean hasita dago
Margarita Robles ministroak azaldu duenez, gerra-gurdi horiek bidaltzearekin batera, erabiltzen eta mantentzen dakiten pertsonak ere bidali beharko dira. Gaur arratsaldean zortzi herrialderen arteko lehen koordinazio bilera egingo dutela ere esan du.
Agentziak | EITB Media
Espainiako Gobernuko Defentsa ministroak, Margarita Roblesek, gaur jakinarazi du bere lantaldea industriarekin lanean ari dela dagoeneko Armadak dituen 2A4 motako Leopard tankeetatik Ukrainara bidaltzeko zeintzuk prestatu daitezkeen erabaki asmoz.
Printzipioz, Zaragozan, Lurreko Armadaren logistika egoitza batean, dauden gerra-gurdietako batzuk konpondu ditzaketela aurreratu du, nahiz eta horietako zenbaitek urteak daramatzaten geldirik, erabili gabe.
Prestaketa horien harira, Robles ministroaren hitzetan, ezin da bidalketa egin, besterik gabe. Garrantzia berezia eman dio bere iritzian "oso zaila" den tanke hauen erabileran ukrainarrak trebatzeari. Horrez gainera, herrialde guztiak ordezko piezekin eta mantenuarekin oso arduratuta daudela azpimarratu du. Gerra-gurdiak bidaltzearekin batera, horiek erabiltzen eta mantentzen dakiten pertsonak ere bidali beharko direla azaldu du.
Lehen koordinazio bilera
Horrez gainera, kazetarien aurrean egindako agerraldian, Defentsa ministroak jakinarazi du gaur, osteguna, egingo dela aliatuen arteko lehen koordinazio bilera. Alemaniako Defentsa ministroak 7 herrialde deitu ditu bilera horretara eta bertan hasiko dira negoziatzen bakoitzak ze ekarpen egingo duen tanke kopuruari edota entrenamentu programari dagokionean.
Hain zuzen ere, Ukrainako ministroak entrenamentuan laguntzeko eskatu diola eskutitz bidez argitu du Margarita Roblesek.
Azkenik, Espainiako Gobernuko zati bat eta oposizioko zati bat bidalketa honen aurka daudela eta, horren inguruan duen iritziari buruz galdetu diote Defentsa ministroari. Bere hitzetan, material hau bidaltzeak "Ukrainako herritarrak defendatzea du helburu".