Basagoiti: 'Independentziagatik elkar hiltzea nahi du Bilduk'

Antonio Basagoiti Euskadiko PPko presidenteak EH Bilduren Gobernu proposamenaren "fanatismoa eta talibanismoa" salatu ditu. Nekazaritza Saila Elikagai-Subiranotasun Sailagatik ordezkatzeko EH Bilduk egindako proposamenaren harira, "independentziagatik euskaldunok elkar hiltzea nahi du Bilduk", esan du.

Basagoiti Gasteizen izan da, PPko Kongresuaren itxiera ekitaldian. Bertan Alfonso Alonso izendatu dute berriro Arabako PPko presidente. Datozen hauteskundeetarako EH Bilduk proposatutako Gobernuaren aurrean, "alternatiba bakarra" PP dela azpimarratu du Basagoitik.

"ETAk jada ez du hiltzen, baina Espainiarekiko apurketaren eta independentziaren inposaketa da egungo mehatxua". Hori dela eta, "Bilduk eta EAJk gehiengoa lortzen badute, horrek fronte independentista bat sortuko luke Legebiltzarrean".

"Bi bide daude: ETAren eta bere helburuen garaipena edo demokraziaren eta elkarbizitzaren garaipena; horra hor jokoan dagoena", azpimarratu du. "Bildu-EAJri aurre egiteko alternatiba bakarra PP da", errepikatu du.