Politika -
Hauteskunde erreforma
Basagoiti: EAJk beldurra eta errua sentitzen du erbesteratuen aurrean
EAEko PPko presidenteak "euskal herritar horien kanporatzearen erantzule zuzena" izatea egotzi dio Bilduri.
Erredakzioa
Antonio Basagoiti EAEko PPko presidenteak adierazi du EAJk "beldurra eta errua" sentitzen duela ETArengatik 'erbesteratuen' aurrean, eta horregatik dagoela 'erbesteratuek' Euskadin eta Nafarroan bozkatzearen aurka. Izan ere, kolektibo horren aurrean iraganean "isilik" egon dela kritikatu du.
Blogean idatzitako artikulu batean, Basagoitik agertu du EAJ ez dela "hauteskunde iruzur baten beldur", aurreko egunetan hainbat buruzagi jeltzalek esan bezala, eta adierazpen horiek "errealitate deseroso bat" saihestea helburu dutela iritzi dio.
PPko buruzagiak nabarmendu du hauteskunde erreforma "ausarta, bidezkoa eta beharrezkoa" dela, eta "pauso bat" dela normalizazio politikoaren bidean.
Basagoiti Bilduri ere zuzendu zaio, eta erreformaren aurka egoteak ez diola "harritzen" esan du. "Euskal herritar horien kanporatzearen erantzule zuzenak dira. Herritar deserosoak dira arrastatu nahi gaituzten Euskadi independentearen proiektuan", erantsi du.
Horren ustez, "ETAk uko egin die armei, euskal gizartearen kemen demokratikoaren ondorioz, baina Bildu ETAk beti nahi izan duen herrialde proiektuaren ordezkaria da gaur egun. Eta proiektu horretan, erbesteratuak ez dira ongietorriak", salatu du.
