Politika -
ESPAINIAKO GOBERNUA
ERCk jakinarazi du Feijooren inbestidurarako babesa negoziatzea proposatu ziola PPk
Ohar batean, PPk ukatu egin du ERCk zabaldutako informazioa, eta ziurtatu du errepublikanoekin "inoiz" ez zirela bildu Feijooren inbestidura negoziatzeko
AGENTZIAK | EITB MEDIA
Iazko uztaileko hauteskunde orokorren ondoren, Alberto Nuñez Feijoo hautagai popularraren inbestidurarako babesa negoziatzea proposatu zion PPk ERCri. Hain zuzen, Carlos Floriano PPren diputatua joan zen proposamenarekin alderdi kataluniarreko ordezkariengana. Hala baieztatu du gaur Marta Rovira ERCko idazkari nagusiak, SER Catalunya irrati-kateari Genevatik eskaini dion elkarrizketan.
"Hauteskundeen ondoren, abuztuan, Floriano (PP) Teresa Jordarengana (ERC) joan zen, negoziatzea proposatzeko. Hitz egitea nahi zuen, gehiengoa osatzeko negoziatzea. Ezetz erantzun genion, guk ez dugula PPkin negoziatzen. Bloke bakarra osatzeko aukera bakarrik zegoela, bloke demokratikoa", esan du Rovirak.
Hain zuzen, azken egunotan jakin da Feijooren inbestidurarako negoziazioen harira PPk Juntsekin izandako hartu-emanetan, popularrak amnistia legearen aukera aztertzera iritsi zirela, gero atzera bota zuten arren, eta Carles Puigdemont Kataluniako presidente ohiari hainbat baldintzekin indultua emateko aukera ere mahai gainean izan zuela Feijook.
Gai horri buruz galdetuta, Rovirak esan du ERCren "harreman politikoak gardentasunez" azaltzea dagokiola berari, eta "Juntsenak Juntsek" argitu beharko dituela.
Ohar batean, PPk ukatu egin du ERCk zabaldutako informazioa, eta ziurtatu du errepublikanoekin "inoiz" ez zirela bildu Feijooren inbestidura negoziatzeko.