Teknologia -
Segurtasun falta
Facebooken aurkako 'eraso sofistikatua' ikertzen ari da FBI
Webgune batean sartu ostean, birus informatiko bat sartu da Facebookeko hainbat langileren ordenagailuetan. Hala ere, erasoak ez dituela erabiltzaileak kaltetu azpimarratu du sare sozialak.
Erredakzioa
Aurreko hilabetean Facebooken aurka izandako "eraso informatiko sofistikatua" ikertzen dabil AEBetako Ikerketa Bulego Federala. Hala ere, erasoak ez dituela erabiltzaileak kaltetu azpimarratu du sare sozialak.
San Francisco Chronicle kazetak jakinarazi duenez, Ikerketa Bulego Federala (FBI) Facebookekin ari da lanean konpainia horren hainbat langileen ordenagailuak kaltetu zuen erasoaren jatorria ezagutzeko.
Ohar baten bidez Facebookek azaldu duenez, "sakelako telefonoentzako garatzaileentzat zuzendutako webgune batean sartu ostean", 'malware' edo birus informatiko bat sartu da Facebookeko hainbat langileren ordenagailuetan.
"Erasoaren berri izan dugunean, ordenagailu kaltedunak isolatu ditugu, agintariei abisatu diegu eta ikerketa abiatu dugu", azaldu du Facebookek bere blogean.
Ahulgarria
Facebookek 1.000 milioi erabiltzaile ditu mundu osoan, eta uneoro eraso informatikoak ari da pairatzen. Oraingo arazoa baliteke larriagoa izatea, Oracleren Java kodea kaltetu duelako.
Hilabete honetan Twitterrek ere beste eraso bat jaso du. Kasu horretan, hackerrek 250.000 erabiltzaileren datuak lapurtu zituzten.
