EAEko hauteskundeak 2020: EAEko hauteskundeak, uztailaren 12an | EITB Hauteskunde autonomikoak

EAE-ko Hauteskundeak 2020

00:18

EAE-ko Hauteskundeak 2020

Hauteskunde-kanpaina

Parte hartzera deituz eta berragertzeei begira amaitu dute kanpaina alderdiek

Agentziak | Erredakzioa

Hauteskunde-kanpainako hamabost egunak, aurreikusita zegoenez, pandemiak baldintzatu ditu.

  • Alderdiek ostiral honetan amaitu dute kanpaina

    Alderdiek ostiral honetan amaitu dute kanpaina. Argazkiak: EFE eta Equo Berdeak.

  • Whatsapp
  • Whatsapp
  • telegram
  • Bidali

Euskal alderdiek igandeko hauteskunde autonomikoetarako kanpaina amaitu dute ostiral honetan, hautesleei botoa eskatzeko azken ekitaldiekin. Kanpaina parte-hartzeko deiak eginda bukatu da; hori bai, alderdi bakoitzak bere argudioak eman ditu, dei hori egitean. Euskal Autonomia Erkidegoan dauden berragertzeei begira ere izan dira hautagaiak.

Aurreikusita zegoenez, pandemiak kanpainako hamabost egunak baldintzatu ditu. Alde batetik, alderdiek ekitaldi politikoetan eta mitinetan kontuan izan behar izan dituzten segurtasun-neurriengatik; beste alde batetik, COVID-19ak era horren ondorioak hautagaiek emandako mezu askotan izan baita protagonista.

Kanpaina amaituta, dena igandean erabakiko da. Egun horretan, euskal herritarrek bozkatzeko aukera izango dute, eta zehaztuko dute, lehendakarigaien esanetan, noren esku utziko duten Euskadiko berreraikitzea zuzentzeko ardura.

EAJk "beldurrik gabe" bozkatzeko eskatu du, "segurtasuna eta bermeak daudelako"

Datorren igandean konfiantzaz bozkatzeko deia egin die EAJk herritarrei, "segurtasuna eta bermeak" daudelako, "beldur" direnen aurrean, abstentzioari baino gehiago "porrotari" beldur diotelako, eta Euskadi krisitik ateratzeko "gidaritza" izango duen alderdi jeltzalearen inguruan "gehiengo handi bat" lortzeko deia egin du.

Bilboko Areatzan egindako mitin batean, ohi bezala, EAJk amaiera eman dio ostiral honetan Eusko Legebiltzarrerako hauteskundeetarako kanpainari, eta bertan izan dira Iñigo Urkullu lehendakari izateko hautagaia, Leixuri Arrizabalaga eta Bakartxo Tejeria Bizkaiko eta Gipuzkoako zerrendaburuak, hurrenez hurren, eta Andoni ortuzar EBBko presidentea.

Guztiek aho batez parte hartzeko deia egin dute, ekainaren 12an "Euskadiren etorkizuna jokoan" dagoelako. "Ez naiz beldur, ez gara beldur botoa ematea segurua delako. Hauteskunde Batzordeak berretsi du berriro ", esan du Urkulluk hauteskundeen azken hitzaldian.

BIDEOA | EAJren ustez, igandekoak 40 urteotako hauteskunderik garrantzitsuenak dira

Gainera, hiru mezu bidali nahi izan dizkie hautesleei. Lehenengoan, gogorarazi du Euskadi "koronabirusak eragindako krisirik larrienaren eta konplexuenaren aurrean" dagoela, "osasun, ekonomia, gizarte eta emozio krisia" delako.

Aurreikuspen ekonomikoak "gogorrak" direla eta pertsona, familia eta enpresa asko "gaizki pasatzen" ari direla azpimarratu ostean, "erantzun, parte hartu eta botoa ematera" deitu du, Euskadi "egoera honetatik atera dadin". "Aterako gara, lehentasuna krisitik indartsu irtetea da. Hiru hilabete sufritu ditugu, hiru urte sufrituko ditugu, baina ez da nahikoa irtetea, indartsuago eta elkarrekin atera behar dugu", adierazi du.

EH Bildu: "Ez dakigu Administraritzak guztien boto-eskubidea bermatuko duen"

EH Bilduk Donostian amaitu du hauteskunde-kanpaina, ekitaldi politikoa eginez, eta Maddalen Iriarte lehendakarigaiak azpimarratu du "oraindik" ez dagoela argi "Administraritzak nola bermatuko duen igandean botoa emateko herritar guztiek duten eskubidea"; izan ere, haren esanetan, "Jaurlaritzak egoera kontrolpean duela dioen arren, datuek gero eta irmoago errefusatzen dute hori".

Arnaldo Otegi EH Bilduko koordinatzaile nagusiak eta David Fernandez CUPeko bozeramaile ohiak ere parte hartu duten ekitaldian, Iriartek eskatu dio Eusko Jaurlaritzari "jendeari argi hitz egin diezaiola, eta esan dezala nola bermatuko duen hauteskundeetan berdintasunean parte hartzeko eskubide demokratikoa"; halaber, Iriarte herritarrei zuzendu zaie, "igandean beren haserrea adieraz dezaten hautestontzietan": "Euren interes partikularrak pertsona guztien osasunaren aurretik jarri dituztenei mezu ozen eta argia helarazteko garaia da", nabarmendu du.

BIDEOA | Iriartek kritikatu du Jaurlaritzak interes elektorala jarri duela osasunaren gainetik

Hautagaiak salatu duenez, larria eta onartezina da botoa emateko eskubidea kentzea koronabirusak kutsatutakoei; EH Bilduk esan duenez, hori da Jaurlaritzaren asmoa,  Osasun sailburuak ostiral honetan bertan iragarri duenez, baina, Iriarteren iritziz, "onartezina da hauteskundeak baino bi egun lehenago Mendia-Urkullu Gobernu koalizioak herritarrei zalantza-mota horiek helaraztea".

Iriarte kezkatuta agertu da horregatik, eta gogorarazi du egoera honen arduradunek izen-abizenak dituztela: "Osasun-bermeak eta berme demokratiko guztiak betetzen ez zirela jakinda, hauteskundeak deitu zituztenak. Bazekiten berragertzeak izateko arrisku handia zegoela, baina ez zituzten oposizioaren proposamenak entzun nahi izan, eta orain ez dute botoa emateko eskubidea bermatzeko B planik ere".

Gorrotxategik hautetsontziak botoz betetzeko deitu du, ezkerreko Gobernua lortzeko

Miren Gorrotxategi Elkarrekin Podemos-IUko lehendakarigaiak euskal herritarrei eskatu die igandean bere koaliziorako boto ugariz betetzeko hautetsontziak, "ezkerreko Gobernua lortzeko, gehiengo ezkertiarra duen herrialde honetan". Haren hitzetan, soilik Elkarrekin Podemos-IUk du ahalmena hori gerta dadin; EH Bildu eta PSE-EE konfort-zonatik irten daitezen, garai historikoaz ardura daitezen, eta aldaketa Euskadira ekar dezaten”.

Koalizio progresistak Bilbon itxi du hauteskunde-kanpaina, Errekalde plazan, ekitaldi politiko bat eginez. Pilar Garrido Podemos Euskadiko autonomia-koordinatzailea, Isabel Salud Ezker Anitza-IUko koordinatzaile nagusia, Unidas Podemoseko diputatu Roberto Uriarte eta Juan Carlos Monedero Podemoseko sortzailea ere izan dira bertan, Gorrotxategirekin batera.

BIDEOA | PSE-EE eta EH Bildu "erosotasunetik" aterako dituela dio Gorrotxategik

Azken ekitaldi honetan, Gorrotxategik berretsi du ezkerreko Gobernuaren aldeko bere apustua: "Proiektu politikoa da, oraingo garaietarako eta etorkizunerako ere; izan ere, horrek bermatuko luke kalitatezko zerbitzu publikoak izatea, zaintzak erdigunean kokatzea, bizitzeko moduko planeta izatea, eta lan-baldintzak duinak izatea".

"Batzuek barregarri utzi nahi izan dute, eta adierazi nahi izan dute zaharkitua eta anakronikoa dela, baina ez da egia", nabarmendu du; nolanahai ere, proiektu hori egia bilakatzeko, "PSE-EE eta EH Bildu mugitu behar dira".

Zentro-eskuineko botoa Iturgaizek "biltzea" eskatu du Casadok kanpaina itxieran

Zentro-eskuineko botoa Carlos Iturgaiz PP+Cs koalizioko lehendakarigaiak "biltzea" eskatu du Pablo Casado Alderdi Popularreko presidenteak. Casadok azpimarratu duenez, Iturgaiz "askatasunaren erraldoi" bat da, eta Eusko Legebiltzarrean talde "eraginkor" bat zuzentzeko gaitasuna du.

PP+Cs koalizioaren kanpaina itxiera ekitaldian parte hartu du Alderdi Popularreko buruzagiak ostiral honetan. Era berean, Ignacio Aguado (Ciudadanos) Madrilgo erkidegoko presidenteordeak eta Iturgaizek berak hitza hartu dute.

BIDEOA | Konstituzionalistak ordezkatzen dituen bakarra dela dio PP+Cs koalizioak

Ostiralean, uztailak 10, Miguel Angel Blanco PPko zinegotziaren bahiketa eta hilketaren 23. urteurrena bete dela gogorarazi du Casadok hitzaldian.

Mendia: "PSE-EErako botoak berreraikitze sozial eta ekonomikorako baliatuko ditugu"

PSE-EEko idazkari nagusi eta lehendakarigai Idoia Mendiak ostiral honetan adierazi duenez, igande honetan bere alderdiak jasotako "boto guztiak" Euskadiko "berreraikitze sozial eta ekonomikorako" baliatuko dituzte; "liskarrerako", aldiz, "bat ere ez dugu erabiliko", nabarmendu du.

PSE-EEk hauteskunde-kanpainari amaiera emateko egindako mitinean eman du mezu hori Mendiak, Donostian, Altza auzoan, Harrobieta plazan. Bertan, Mendiarekin batera, Maria Jesus Montero Ogasun ministro eta Espainiako Gobernuko bozeramailea, PSE-EEren Arabako zerrendaburu Gloria Sanchez eta Gipuzkoako zerrendaburu eta lurralde historiko horretako sozialisten idazkari nagusi Eneko Andueza ere izan dira.

BIDEOA | Botoak krisiari aurre egiteko erabiliko dituztela dio Mendiak

"Ezkerreko lidergoa, politika fidagarriak eta zorrotzak eta konponbideak, ez arazo gehiago" nahi dituzten euskal herritarrei eskatu die botoa Idoia Mendiak, "bizikidetzan, akordioan eta lankidetzan sinesten dutenei". Gainera, zehaztu du PSE-EEk eskaini eta bermatzen duela Eusko Jaurlaritza "liskarretik urrun eta Pedro Sanchezen Gobernuarekin bat eginda" egotea.

Equo Berdeak: "Betiko blokeekin etsituta daudenentzako alternatiba gara"

Joserra Becerra Equo Berdeakeko lehendakarigaiak ziurtatu duenez, koalizioa "aukera desberdina da", eta "betiko blokeekin etsituta dauden milaka herritar" horren alde ari dira egiten.

Equo Berdeakek Gasteizen egin du, ostiral honetan, hauteskunde-kanpainako azken ekitaldia. Bertan, Becerrak esan du koalizioa "proiektu desberdina" dela, eta, haren esanetan, "aukera politiko tradizionalek ordezkatzen ez dituztela" uste duten herritarren "gero eta babes handiagoa" ari da jasotzen.

BIDEOA | Equo Berdeakek betiko alderdiekin pozik ez daudenei euren babesa eskatu die

Iruzkinak

  • Publizitatea
    • BILATZAILEA
    Publizitatea
    Publizitatea
    Publizitatea

    Bisitatuena

      Kargatzen ikusiena
      Kargatzen ikusiena