Llanos: 'Emakumeen erasotzaile bat hautagai izango balitz, zer?'

EAEko PPk espero du Hauteskunde Batzordeak ez onartzea Arnaldo Otegiren hautagaitza, eta esan du bere jarraitzaileak “haserretu” egingo liratekeela indarkeria matxistagatik kondenatutako norbait beste alderdi baten hautagaia izango balitz.

PPren hauteskunde lantaldea Bilbon bildu da gaur, eta, horren ostean, Nerea Llanos alderdiko idazkari nagusiak prentsaurrekoa eskaini du. Horretan, Otegiren hautagaitzari buruz galdetu diote kazetariek.

Atzo, PPk, UPyDk eta Ciudadanosek iragarri zuten EH Bilduko lehendakarigaiaren hautagaitzaren aurka egingo dutela. EAJk eta Podemosek defendatu egin dute Otegik hauteskundeetara aurkezteko duen eskubidea, eta PSEk ez du ezer esan.

Llanosen esanetan, PPk “neurriak” hartuko lituzke Hauteskunde Batzordeak Otegiren hautagaitzari argi berdea emango balio. “Ulertezina izango litzateke terrorismo delituengatik kondenatua izan den pertsona bat lehendakarigai izatea”, adierazi du.

“Ezker abertzaleak bere historiako alde txarrena ordezkatzen duen hautagai bat aurkeztu du berriro. Ezker abertzaleak ez ditu eman batzuek ikusi nahi dituzten pausoak. Demokrata txarteleko 12 puntuak galdu dituen pertsona bat aurkeztu du”, deitoratu du.

Llanosek nabarmendu duenez, “harrigarria da norbaitek pentsatzea normala dela. Zer pentsatuko lukete beste alderdi baten hautagaia genero indarkeriagatik kondenatutako pertsona bat izango balitz?”.