Estatu espainiarra independentziaren hipotesia onartzen hasia dela uste du Kataluniako Asanblada Nazionalak (ANC).
Berehala Kataluniaren independentzia aldarrikatzearen alde agertu da Jordi Sanchez Kataluniako Asanblada Nazionaleko (ANC) presidentea baldin eta Estatu espainiarrak katalanak hertsatzen baditu -adibidez, funtzionarioei soldata erretiratuta- irailaren 27ko hauteskundeetan independentistak gailentzen badira eta Katalunian prozesu eratzaile bat abian jartzen bada.
Europa Press albiste agentziari eskainitako elkarrizketan, Sanchezek nabarmendu du Estatuak betebeharrak dituela hiritarrekin maila indibidualean eta ezin dituela horiek saihestu. Hala ere, horrelakorik gertatuz gero, auzitegiek esku hartu beharko luketela gaineratu du.
Hori dela eta, ez du aurreikusten Estatuak ikuspuntu ekonomikotik herritarrak zigortuko dituenik: "Horrelakorik gertatuko balitz, gidaritza hartu eta berehala independentzia aldarrikatzeko unea litzateke".
Sanchezen esanetan, Estatuak pentsioak ordaintzen jarraitu behar du Katalunia independentea denean ere kanpoan bizi arren Espainian kotizatu duten herritarrak egon daitezkeelako. Dena den, gai horiek guztiak subiranotasun prozesuan argitu beharko direla azpimarratu du, harik eta Kataluniako Gobernuak katalanen eskubide guztiak berma ditzan.
Bestalde, Kataluniak dagozkion ordainketen aurre egiteko gai den Ogasuna izan eta legedia osatu arte Espainiako sistemarekin jarraitzearen alde agertu da.
Bide-orrian agertzen den bezala prozesu hori 18 hilabetean egingo den galdetuta, Sanchezek erantzun du independentziaren aldeko gehiengoa zenbat eta zabalagoa izan orduan eta "azkarragoa eta seguruagoa" izango dela prozesua.