Ekonomia -
Deslokalizazioa
Candy Hoover ixteko erabakiaren aurka protesta egin du Bergarak
Ehunka pertsonek manifestazio batean parte hartu dute lantegia zabalik mantentzea eskatzeko. Lehentxeago, Bergarako Udalak mozio bat onartu du gauza bera eskatzeko.
Erredakzioa
Ehunka lagunek manifestazioa egin dute gaur Bergaran (Gipuzkoa), Candy Hoover enpresa zabalik jarraitzea eskatzeko. Lantegiak 150 langile ditu eta itxi behar dutela iragarri du zuzendaritzak. Fabrikak “etorkizuna” duela eta “bideragarria” dela errepikatu dute langileek arratsaldean.
Protesta Bergarako erdialdean egin dute eta “Lanpostu eta etorkizun duin baten alde” lelopean kaleak hartu dituzte manifestariek.
Manifestazioa egin baino lehen, Bergarako Udalak mozio bat onartu du ezohiko udalbatzan. Candy Hoover aurrera jarraitzea eskatu du Udalak. Bestalde, lantegiko lur-sailak bere horretan uztea eskatu dute zinegotziek. Bilduk, Aralarrek, EAJk eta PSE-EEk mozioari babesa eman diote.
Kontsultaldia
Kontsultatzeko garaia ostegunean hasiko da eta langileen ordezkariek 150 lanpostuak mantentzea eskatuko diote zuzendaritzari.
Bestalde, Candy Hoovereko langileak Eusko Jaurlaritzako ordezkariekin bilduko dira azaroaren 19an.
