Itxi

2020/04/08

21:00

Ekonomia

Koronabirusa

Mercedes-Benzek apirilaren 26ra atzeratu du jardueraren hasiera Gasteizen

Agentziak | Erredakzioa

Lan-arriskuen prebentziorako batzordearen bileran, martxoaren 16tik etenda dagoen jarduerari berriro ekiteko aukera aurkeztu dute gaur.

  • Gasteizko Mercedes-Benz lantokia

    Gasteizko Mercedes-Benz lantokia. Argazkia: EFE.

  • Whatsapp
  • Whatsapp
  • Telegram
  • Bidali

Mercedes-Benzeko zuzendaritza Gasteizko lantegian jarduera pixkanaka berrabiarazteko aukera aztertzen ari da apirilaren 26tik aurrera, alarma egoeraren bigarren luzapena amaitu ondoren. 5.000 pertsona ari dira lanean lantegian.

EAEko enpresa handieneko lan-arriskuen prebentziorako batzordearen bilera egin dute gaur, eta enpresako zuzendaritzaren zirriborro bat aztertu da. Martxoaren 16tik etenda dagoen jarduerari apirilaren 20an berrekiteko aukera azaltzen da bertan.

Hasiera batean, enpresaren zuzendaritzak hilaren 14an lantegia berriro irekitzea aurreikusita zeukan, eta helburua hori dela onartu du, baina, egun, ez dakite posible izango den, ez baita ziurra data horretarako aurreikusitako segurtasun eta higiene neurriak ezarri ahal izango dituenik, eta horniduren inguruan "zalantza dezente" daudelako.

Bilera hori egin eta ordu batzuetara, Emilio Titos lantegiko zuzendariak idazki bat bidali die langileei. Bertan, multinazionalak "apirilaren 26ko data" bere gain hartzen duela azaldu die "bere jarduera industrialari berriz ekiteko erreferentzia gisa", eta lana berriz hasteko egun zehatza "behar bezala jakinaraziko" duela.

Gaineratu duenez, lantegiko krisi kabinetea beharrezko neurri pertsonalak, sanitarioak, logistikoak eta azpiegituretakoak prestatzen ari da jarduera bertan behera uzteko epean, "egoerak ahalbidetzen duen datarik hurbilenean abiatze mailakatua bermatzeko".

Datorren astean langileen ordezkariekin beste bilera bat egingo dute, prebentzio neurriei buruzko zirriborroa euren ekarpenekin osatuko dute, eta lantegiko zuzendaritza hilaren 20an zenbat langile egon daitezkeen zehazten saiatuko da, bajan daudenak eta berrogeialdian daudenak zenbatuz.

Enpresak aurreikusitako plana apirilaren 20an lehen lan-txanda batekin hastea da, hurrengo astean birekin eta hirugarrenean hirurekin.

Egoera honek irauten duen bitartean, indarrean jarraituko du koronabirusaren pandemiak eragindako ondorioengatik halabeharrez onartutako aldi baterako enplegu erregulazioak.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Gaitzaren sintomarik baduzu, EAEn bizi bazara, ohiko zure osasun-zentrora deitu; Osasun Batzordearen telefonoa, 900 20 30 50 zenbakia, eskuragarri duzu, zalantzarik izatekotan. Nafarroan bizi bazara, Osasun Batzordearen telefonora dei dezakezu: 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

  • Bisitatuena

      Kargatzen ikusiena
      Kargatzen ikusiena
    ;