Itxi

Ekonomia

Lan-gatazka

ITP Aero Castingek Barakaldoko eta Sestaoko lantegietako 87 behargin kaleratuko ditu

Agentziak | EITB Media

Langileek 24 orduko grebari eutsiko diote. Enpresa-batzordearen ustez, ITP Aero Castingeko zuzendaritzak "ez du inoiz borondaterik izan langileen kaleratzea saihesteko akordio batera iristeko".

  • ITP Aero Casting enpresako langileen protesta, enplegu-erregulazioko espedientearen aurka.

    ITP Aero Casting enpresako langileen protesta, kaleratzeen aurka. Artxiboko argazkia: @LEzkerraldea

ITP Aero Casting enpresako zuzendaritzak, Barakaldoko eta Sestaoko (lehengo PCB) lantegietako lan-erregulazioko espedientearen azken erabakia jakinarazi dio gaur enpresa-batzordeari, eta, horren ondorioz, 87 langile kaleratuko ditu guztira.

Enpresa batzordeak ohar baten bidez jakitera eman duenez, zuzendaritzak "azken erabakiaren berri" eman zuen atzo. Horren arabera, 87 langile kaleratuko ditu, eta horiei "ad cautelam" egindako beste hiru kaleratze gehituko zaizkie.

Testuinguru horretan, lan egindako urte bakoitzeko 20 eguneko soldataren legezko kalte-ordaina ezarri du zuzendaritzak, eta urtebetetik beherako aldiak hilabeteka hainbanatuko dira, gehienez ere 12 hileko soldatarekin. Horrez gain, aldi baterako enplegu erregulazio txosten bat aurkeztuko du 2021 eta 2022 urteetarako, "arrazoi ekonomiko eta produktiboengatik".

Ildo horretatik, 55 urte edo gehiago bete dituzten langileentzat Gizarte Segurantzarekin hitzarmen berezi bat sinatzearen kostua finantzatzeko konpromisoa hartu du enpresak, legez ezarritako baldintzetan. Batzordearen arabera, ordea, talde horrek ez ditu dozena bat langile baino gehiago izango.

Enpresa-batzordeak ziurtatu duenez, zuzendaritzak lan-erregulazioko espedientearen inguruan hartutako erabakia "langileen aurkako jokabidea" da, eta salatu duenez, "langileek hainbat urtez ahalegin handia egin ondoren, hori da zuzendaritzak eta ITP taldeak berak trukea eskaintzen duten saria".

Hori dela eta, enpresa-batzordearen ustez, ITP Aero Castingeko zuzendaritzak "ez du inoiz borondaterik izan langileen kaleratzea saihesteko akordio batera iristeko". Horren harira, "erabakia aldez aurretik eta justifikatu nahi dutena baino askoz ere lehenago" hartu dutela gaineratu du enpresa-batzordeak.

Hala, "duela 4 urte Sestaon lantegi berri bat sortzeko enpresa horrek jaso zuen laguntza ekonomikoaren ostean, prozesu hori saihesteko" eskatu dio batzordeak Bizkaiko Foru Aldundiari, baita Eusko Jaurlaritzari ere, "Espainiako Estatuko aurrekontu orokorretatik eratorritako erreskate funtsak" sektore horretan erabiltzeko eskatuz.

Gauzak horrela, langileek 24 orduko grebari eutsiko diote, eta enpresa batzordean ordezkaritza duten sindikatuetako zerbitzu juridikoak (UGT, CCOO, LAB eta ELA) "enplegu-erregulazioko espedientearen inpugnazioa prestatzen ari dira".

  • Bisitatuena

      Kargatzen ikusiena
      Kargatzen ikusiena