Huerta de Peraltako greba bertan behera, LAB eta zuzendaritza ados jarri ondoren

LAB sindikatuak bertan behera utzi du maiatzaren 3rako eta 5erako deitutako greba deialdia, zuzendaritzak "lan giroa hobetzeko neurri zehatzak onartu eta gero".

Sindikatuak ohar baten bidez jakitera eman duenez, "enpresak langile gehienei ematen dizkien tratu txarrak" salatu nahi zituzten grebaren bidez, baita "langileen eskariak kontuan izango dituen eragikortasun orokorrerako akordioa egitea" ere.

Dena dela, enpresak hainbat eskari onartu eta gero, mobilizazioa bertan behar utzi eta Enpresako Akordioa negoziatzeko prozesuari berrikiteko aukera ireki da, eta "pozik" agertu da LAB hori dela eta.

Akordioaren baitan, zuzendaritzaren eta langileen arteko komunikazioa errazteko bideak adostu dira, gatazka egoera saihesteko, eta hala, Huerta de Peraltan "lan harremanek azken garaiotan izan duten tentsioa arintzea" espero dute.

Greba bertan behera utzi eta gero, lan zentroan diharduten langileen baldintzak arautzeko negoziaketei berrekingo diete. LABek Enpresa Akordioa defendatzen jarraituko du, Nafarroako Nekazaritza eta Abeltzaintzza Hitzarmen Kolektiboa hobetzeko helburuz.

Aurrez ere izan dira gatazkak Huerta de Peralta enpresan. 2018ko abenduaren 26tik 2019ko urtarrilaren 22ra greban egon ziren langileak hitzarmena ez betetzeagatik enpresak zor zien dirua eskatzeko eta Enpresako Akordioa egiteko negoziaketa zabaltzea eskatzeko. Tarte horretan lau kaleratze izan ziren: bi berriz ere lanera itzuli ziren, beste bati kalteordaina eman zitzaion eta laugarrena epaitegiaren erabakiaren zain geratu zen. Bi aldeen akordioarekin amaitu zen greba urtarrilaren 22n.