Espainiako Gobernuak gasaren prezioa mugatzea ona dela uste du Tapiak, baina etxeetan ez dela nabarituko

Argindarra ekoizteko erabiltzen den gasaren prezioa mugatuko du gaur Espainiako Gobernuak. Albiste ontzat jo badu ere, Arantxa Tapiak ez du uste neurri horren eragina etxeetan "inola ere nabarituko" denik. Hori dela eta, neurri gehiago hartzeko eskatu dio Espainiako Gobernuari, bereziki, familia zaurgarrienei laguntzeko. Euskadi Irratiko "Faktoria" saioan egin dioten elkarrizketan, Eusko Jaurlaritzako Ekonomiaren Garapen, Jasangarritasun eta Ingurumen sailburuak ohartarazi du gasaren prezioak gora egiten jarraituko duela datozen hilabeteetan, eta neguan Europan gas hornidura arazoak egon daitezkeela.

Errusiak Poloniatik barrena Europara gasa bidaltzeari utzi dio dagoeneko, eta Finlandia NATOn sartzen bada (Norvegia ere aztertzen ari da) neurri "tekniko-militarrak" iragarri ditu. Testuinguru horretan, Tapiaren iritziz logikoena da gasaren salneurriak berriro ere gora egitea. Are gehiago, hornikuntza arazoa egoteko arriskua aipatu du. Dena dela, kasu horretan Europar Batasunak gasa trukatzeko mekanismoak jarriko dituela adierazi du.

Trantsizio energetikoaren inguruan, Repsolek eta Iberdrolak ikuspegi ezberdinak dituztela agerian gelditu da aste honetan. Horri buruz galdetuta, ñabardura egin nahi izan du sailburuak.

Gipuzkoan atzeman diren hegazti-gripe kasuei lotuta, lasaitasun mezua zabaldu nahi izan du sailburuak eta pertsonentzat ez dagoela arriskurik azaldu du. Hala ere, ikuskapen zorrotzak egiten ari direla nabarmendu du, gaitzaren hedapena kontrolpean hartzeko.