Alokabidek 'ez du inor etxegabetu baliabiderik ez izateagatik'

Covadonga Solaguren Eusko Jaurlaritzako Etxebizitza sailburuordeak ziurtatu duenez, Alokabidek orain arte "ez du inor etxegabetu baliabide ekonomikorik ez izateagatik". Bestalde, sailburuordeak Kaleratzeak Stop plataformako kideei azaldu dienez, ordaintzeko zailtasunak dituzten Alokabideko erabiltzaileekin akordio batera heltzeko borondatea du Eusko Jaurlaritzak.

Solaguren Kaleratzeak Stop plataformako arduradunekin bildu da gaur. "Alokabiderekin alokairu kontratu berria sinatzen edo berritzen duten maizterrek ez dute diru-sarreren % 30 baino gehiagoko errenta ordainduko", azaldu du Etxebitza sailburuordeak.

"Edozein kasutan, Alokabidek ez du inor etxegabetzen, baliabide ekonomikorik ez izateagatik bakarrik. Jaso diren kasuetan beste baldintza batzuk eman dira: legearen urraketak, elkarbizitza arazoak eta integrazio soziala", azpimarratu du Solagurenek.

Kasu horietan, elkarte publikoak kaltedunekin negoziatu duela gogorarazi du Solagurenek, epaitegietako jakinarazpena jaso eta gero.

Errenta ordaintzeko zailtasunak dituzten kasuetan Alokabideren zerbitzuen berri emateko eskatu die sailburuordeak plataformako kideei.